నిజామాబాద్ జిల్లా గాంధారి మండల కేంద్రంలో కార్మిక శాఖ ఆధ్వర్యంలో నిర్వహించిన ప్రత్యేక లేబర్ కార్డు నమోదు కార్యక్రమం విజయవంతమైంది. ప్రజా పాలన ప్రగతి ప్రణాళికలో భాగంగా, అర్హులైన ప్రతి కార్మికుడికి ప్రభుత్వ ఫలాలను అందించడమే లక్ష్యంగా ఈ డ్రైవ్ను చేపట్టారు. హరాలే గార్డెన్స్లో జరిగిన ఈ కార్యక్రమంలో సహాయ కార్మిక అధికారి కమ్రోద్దీన్ ముఖ్య అతిథిగా పాల్గొని కార్మికులకు దిశానిర్దేశం చేశారు.
కార్మిక కార్డు కలిగి ఉండటం వల్ల కలిగే ప్రయోజనాలను వివరిస్తూ, ప్రమాద బీమా, ఆరోగ్య సంరక్షణ మరియు ప్రభుత్వ సంక్షేమ పథకాలు నేరుగా లబ్ధిదారులకు అందుతాయని ఆయన పేర్కొన్నారు. కేవలం కొత్త కార్డుల జారీనే కాకుండా, గడువు ముగిసి నిలిచిపోయిన పాత కార్డుల రెన్యువల్ ప్రక్రియను కూడా అక్కడికక్కడే పూర్తి చేశారు.
ఈ సందర్భంగా స్థానిక సర్పంచ్ మమ్మాయి రేణుకా సంజీవ్ యాదవ్ మాట్లాడుతూ, మండలంలోని భవన నిర్మాణ కార్మికులందరికీ కార్డులు అందేలా గ్రామపంచాయతీ తరపున పూర్తి సహకారం అందిస్తామని హామీ ఇచ్చారు. త్వరలోనే ప్రత్యేక అవగాహన సదస్సులు నిర్వహించి, ఏ ఒక్క కార్మికుడు నష్టపోకుండా చర్యలు తీసుకుంటామని తెలిపారు.18 నుండి 60 ఏళ్ల లోపు ఉండి, భవన నిర్మాణ మరియు ఇతర అసంఘటిత రంగాల్లో పనిచేసే కార్మికులు దరఖాస్తు చేసుకోవచ్చు. మరణిస్తే బీమా సౌకర్యం, వివాహ కానుక, ప్రసూతి సాయం.. పిల్లల చదువుల కోసం ఆర్థిక సాయం అందజేస్తారు.