డిజైన్, ఫీచర్లలో భారీ అప్‌డేట్స్ తో సెప్టెంబర్ 5న రాబోతున్న Maruti Baleno Facelift..!

Maruti Baleno Facelift: మారుతి సుజుకి తన పాపులర్ ప్రీమియం హ్యాచ్‌బ్యాక్ బాలెనొ ఫేస్ లిఫ్ట్ (Baleno Facelift)ను భారత మార్కెట్లో విడుదల చేయడానికి సిద్ధమైంది. కంపెనీ తెలిపిన వివరాల ప్రకారం.. కొత్త బాలెనో ఫేస్‌లిఫ్ట్ 2026 సెప్టెంబర్ 5న ఇండియాలో లాంచ్ కానుంది. పండుగ సీజన్‌కు ముందే ఈ అప్డేటెడ్ మోడల్ మార్కెట్లోకి రానుంది. పూర్తి మెకానికల్ మార్పుల కంటే డిజైన్, ఫీచర్లు, ఇంటీరియర్ ప్రీమియం అనుభూతిపై ప్రధానంగా మార్పులు ఉండే అవకాశం ఉంది. ప్రస్తుతం మార్కెట్లో ఉన్న బాలెనో రెండో జనరేషన్ మోడల్. ఇది 2022లో మొదటిసారిగా లాంచ్ అయ్యింది.

డిజైన్‌ మార్పులు:

ఇప్పటికే రోడ్లపై కనిపించిన టెస్ట్ మ్యూల్స్‌ను పరిశీలిస్తే బాలెనో ఫేస్‌లిఫ్ట్‌లో ప్రధాన మార్పులు ముందు భాగంలో ఉండే అవకాశం ఉంది. ఇందులో కొత్త డిజైన్‌తో కూడిన గ్రిల్ ను అందించనున్నట్లు తెలుస్తోంది. హెడ్‌ల్యాంప్స్‌ను కనెక్ట్ చేసేలా హారిజాంటల్ క్రోమ్ బార్ ఉండవచ్చని అంచనా. ప్రస్తుత మోడల్‌లో ఉన్న బూమరాంగ్ ఆకారంలోని LED డేటైమ్ రన్నింగ్ లైట్స్ కొనసాగనున్నాయి. హెడ్‌ల్యాంప్ డిజైన్‌లో మాత్రం పెద్దగా మార్పులు ఉండకపోవచ్చు. ఫ్రంట్ బంపర్‌ను రీడిజైన్ చేయనున్నారు. ప్రస్తుతం ఉన్న మోడల్‌లో కనిపించే ఫాగ్ ల్యాంప్స్ టెస్ట్ వాహనాల్లో కనిపించకపోవడంతో, ఫేస్‌లిఫ్ట్‌లో వీటిని తొలగించే అవకాశం ఉంది.

సైడ్ ప్రొఫైల్‌లో పెద్దగా మార్పులు ఉండకపోవచ్చు. కొత్త అల్లాయ్ వీల్ డిజైన్‌ను అందించే అవకాశం ఉంది. అయితే కారు మొత్తం సిల్హౌట్, పుల్-టైప్ డోర్ హ్యాండిల్స్, షోల్డర్ లైన్ వంటి అంశాలు దాదాపు యథాతథంగా కొనసాగే అవకాశం ఉంది. వెనుక భాగంలో కొత్త డిజైన్ బంపర్‌ను అందించవచ్చు. అయితే ప్రస్తుతం ఉన్న ర్యాప్‌రౌండ్ LED టెయిల్ ల్యాంప్స్‌లో పెద్దగా మార్పులు ఉండకపోవచ్చని తెలుస్తోంది. రూఫ్‌పై ఉన్న స్పాయిలర్, రియర్ వైపర్ కూడా కొనసాగనున్నాయి.

ఇంటీరియర్, ఫీచర్లు:

ఇంటీరియర్‌లో ప్రస్తుత బాలెనో డ్యాష్‌బోర్డ్ లేఅవుట్‌ను కొనసాగించే అవకాశం ఉంది. ఇందులో 9 అంగుళాల ఫ్రీస్టాండింగ్ టచ్‌స్క్రీన్ ఇన్ఫోటైన్‌మెంట్ సిస్టమ్, ట్రాపిజాయిడ్ ఆకారంలోని AC వెంట్స్, త్రీ-స్పోక్ స్టీరింగ్ వీల్ వంటి అంశాలు కొనసాగనున్నాయి. అయితే క్యాబిన్‌ను మరింత ప్రీమియంగా కనిపించేలా కొత్త అప్‌హోల్స్టరీ, కొత్త ట్రిమ్ ఫినిషెస్, అదనపు కన్వీనియన్స్ ఫీచర్లను జోడించే అవకాశం ఉంది. అలాగే సింగిల్-పేన్ ఎలక్ట్రిక్ సన్‌రూఫ్, యాంబియంట్ లైటింగ్ వంటి ఫీచర్లు కూడా రావచ్చని అంచనా. ప్రస్తుత మోడల్‌లో ఉన్న ఆటోమేటిక్ క్లైమేట్ కంట్రోల్, 6-స్పీకర్ ఆడియో సిస్టమ్, ఎలక్ట్రికల్‌గా అడ్జస్ట్ చేసుకునే ORVMలు, ఆటో-డిమ్మింగ్ IRVM వంటి ఫీచర్లు కొనసాగనున్నాయి. అయితే పూర్తి ఫీచర్ల జాబితాను కంపెనీ లాంచ్ సమయంలో వెల్లడించనుంది.

ఇంజిన్, గేర్‌బాక్స్:

పవర్‌ట్రెయిన్ విషయంలో పెద్దగా మార్పులు ఉండకపోవచ్చని తెలుస్తోంది. బాలెనో ఫేస్‌లిఫ్ట్‌లో ప్రస్తుత 1.2-లీటర్ న్యాచురల్లీ ఆస్పిరేటెడ్ పెట్రోల్ ఇంజిన్ కొనసాగనుంది. ఇది 90 HP పవర్, 113 nm టార్క్ ఉత్పత్తి చేస్తుంది. ఈ ఇంజిన్‌కు 5-స్పీడ్ మాన్యువల్ లేదా 5-స్పీడ్ AMT గేర్‌బాక్స్ ఆప్షన్లు ఉండనున్నాయి. CNG వెర్షన్ కూడా కొనసాగనుంది. CNG మోడల్ 77.5 HP పవర్, 98.5 nm టార్క్ అందిస్తుంది. ఇది కేవలం 5-స్పీడ్ మాన్యువల్ గేర్‌బాక్స్‌తో మాత్రమే లభించే అవకాశం ఉంది.

ధర:

ప్రస్తుతం మారుతి సుజుకి బాలెనొ ధర రూ.5.99 లక్షల నుంచి రూ.9.10 లక్షల (ఎక్స్-షోరూమ్) మధ్యలో ఉంది. ఫేస్‌లిఫ్ట్ వెర్షన్‌లో కొత్త డిజైన్, అదనపు ఫీచర్లు అందించే అవకాశం ఉన్నందున ప్రస్తుత మోడల్‌తో పోలిస్తే ధర కొంత పెరిగే అవకాశం ఉంది. అయితే అధికారిక ధరలను 2026 సెప్టెంబర్ 5న లాంచ్ సమయంలో కంపెనీ ప్రకటించనుంది.