Sita in Ramayana: రణ్బీర్ కపూర్ రాముడిగా, సాయి పల్లవి సీతగా, యష్ రావణాసురుడిగా ఎన్నో అంచనాల మధ్య తెరకెక్కిన ప్రతిష్టాత్మక చిత్రం ‘రామాయణ: రైజ్ ఆఫ్ ఏ లెజెండ్’. విడుదలైన మొదటి రోజు నుంచే ప్రేక్షకులను విశేషంగా ఆకట్టుకుంటూ బాక్సాఫీస్ వద్ద భారీ కలెక్షన్లను కొల్లగొడుతున్న ఈ సినిమాను ఒక విమర్శ మాత్రం ఇప్పటికీ వెంటాడుతోంది. ఎంతో సాత్వికురాలైన సీతాదేవిని సినిమాలో యోధురాలిగా, యాక్షన్ సన్నివేశాల్లో ఎలా చూపిస్తారంటూ కొందరు అభ్యంతరం వ్యక్తం చేశారు. అయితే, ఈ విమర్శలపై ఇన్ని రోజులుగా మౌనంగా ఉన్న దర్శకుడు నితీష్ తివారి తాజాగా ఒక ఇంటర్వ్యూలో స్పందిస్తూ.. బలమైన సాహిత్య, పురాణ ఆధారాలతో వివరణ ఇచ్చారు.
సీత యోధురాలి రూపం
సీతాదేవిని కేవలం కష్టాలను భరించే మహిళగా మాత్రమే కాకుండా.. అపారమైన శక్తికి ప్రతిరూపంగా, అవసరమైనప్పుడు దుష్టులను ఎదుర్కొనే యోధురాలిగా చిత్రీకరించడానికి మన భారతీయ ఇతిహాసాల్లోనే స్పష్టమైన ఆధారాలు ఉన్నాయని నితీష్ తివారి పేర్కొన్నారు. ముఖ్యంగా సంస్కృతంలోని ‘అద్భుత రామాయణం’, 15వ శతాబ్దానికి చెందిన ఒడియా ‘బిలంక రామాయణం’లలో సీత పాత్ర చాలా భిన్నంగా, శక్తివంతంగా ఉంటుందని ఆయన గుర్తుచేశారు. ఈ కథనాల్లో సీత కేవలం సహనానికి, త్యాగానికి ప్రతీక మాత్రమే కాదని, క్రియాశీలకంగా దుష్ట శక్తులతో పోరాడే యోధురాలని, విశ్వశక్తి స్వరూపిణి అని ఆయన వివరించారు.
రావణుడిని సంహరించిన సీత
తన వాదనకు బలం చేకూరుస్తూ నితీష్ తివారి ప్రస్తావించిన అంశాల్లో.. ‘సహస్ర రావణుడి’ కథ అత్యంత ఆసక్తికరంగా ఉంది. కొన్ని రామాయణ కథనాల ప్రకారం రావణాసురుడి కంటే అత్యంత శక్తివంతుడైన వెయ్యి తలల సహస్ర రావణుడితో యుద్ధం చేసే సమయంలో శ్రీరాముడు సైతం నిస్సహాయ స్థితికి చేరుకుంటాడు. ఆ క్లిష్ట సమయంలో సీతాదేవి తన అసలైన దివ్యశక్తిని ఆవిష్కరిస్తూ మహాకాళి రూపాన్ని ధరించి, ఆ రాక్షసుడిని సంహరిస్తుంది.
ఆధారాలతోనే చిత్రీకరణ
ఈ పౌరాణిక ఘట్టాన్ని ఉదహరిస్తూ.. సీతలోని యోధురాలి కోణం ఆధునిక కాలంలో సృష్టించిన కొత్త ఆలోచన కాదని, తరతరాలుగా వస్తున్న భారతీయ రామాయణ సంప్రదాయాల్లోనే అలాంటి కథనాలు ఉన్నాయని దర్శకుడు స్పష్టం చేశారు. కేవలం నిర్దిష్టమైన సాహిత్య ఆధారాల మేరకే తన సినిమాలో సీతాదేవిని సాత్వికురాలిగానే కాకుండా, అవసరమైనప్పుడు శస్త్రాలు పట్టే యోధురాలిగా చూపించామని నితీష్ తివారి ఫుల్ క్లారిటీ ఇచ్చారు.

