Internet Services Restored: జమ్మూ కాశ్మీర్‌లోని పూంచ్, రాజౌరి జిల్లాల్లో రెండు ఆర్మీ వాహనాలపై ఉగ్రదాడి జరిగిన తర్వాత మొబైల్ ఇంటర్నెట్ సేవలను సస్పెండ్ చేసిన సంగతి తెలిసిందే. ఇంటర్నెట్ సేవలను నిలిపివేసిన వారం తర్వాత మొబైల్ ఇంటర్నెట్ సేవలు పునరుద్ధరించినట్లు అధికారులు వెల్లడించారు. పుకార్లు వ్యాప్తి చెందకుండా నిరోధించడానికి, శాంతిభద్రతల పరిస్థితి తలెత్తకుండా నిరోధించడానికి ముందుజాగ్రత్త చర్యగా గత శుక్రవారం ఆంక్షలు అమలు చేయబడ్డాయి.
“రాజౌరీ-పూంచ్ బెల్ట్‌లో సేవలు పునరుద్ధరించబడ్డాయి. పరిస్థితి సాధారణంగా ఉంది” అని జమ్మూ రీజియన్ డివిజనల్ కమిషనర్ రమేష్ కుమార్ తెలిపారు. ఉగ్రవాదుల ఆకస్మిక దాడిలో నలుగురు సిబ్బంది మరణించిన తర్వాత సైన్యం ప్రశ్నించడానికి అదుపులోకి తీసుకున్న వారిలో ముగ్గురు వ్యక్తులు మరుసటి రోజు అనుమానాస్పదంగా మరణించారు. వారి మరణాలపై విచారణ కొనసాగుతున్నందున వారి మృతదేహాలను అంత్యక్రియల కోసం వారి కుటుంబాలకు అప్పగించారు.