Maro Charitra: ఆ ఒక సినిమా వల్ల.. 20 జంటలు ఆత్మహత్య?

సినిమా అనేది కేవలం వినోదం మాత్రమే కాదు, అది సమాజంపై ఎంతటి బలమైన ముద్ర వేస్తుందో చెప్పడానికి 1978లో విడుదలైన ‘మరో చరిత్ర’ ఒక నిదర్శనం. కమల్ హాసన్, సరిత ప్రధాన పాత్రల్లో కె. బాలచందర్ తెరకెక్కించిన ఈ క్లాసిక్ లవ్ స్టోరీ అప్పట్లో ఒక సంచలనం. అయితే ఈ సినిమా విజయం వెనుక ఒక విషాదకరమైన కోణం కూడా ఉంది. ఈ సినిమా క్లైమాక్స్‌లో ప్రేమికులిద్దరూ కొండపై నుంచి దూకి ప్రాణాలు విడుస్తారు. అయితే

వెండితెరపై ఆ దృశ్యాన్ని చూసి చలించిపోయిన దాదాపు 20 ప్రేమ జంటలు (మొత్తం 40 మంది), తమ ప్రేమ విఫలమైందన్న బాధతో నిజజీవితంలో కూడా అలాగే ఆత్మహత్యలకు పాల్పడ్డారు. దేశవ్యాప్తంగా అప్పట్లో ఈ వార్త పెద్ద కలకలం రేపింది. సినిమాల్లోని హీరో హీరోయిన్లను స్ఫూర్తిగా తీసుకుని ఇలా ప్రాణాలు తీసుకోవడంపై మేధావులు ఆందోళన వ్యక్తం చేశారు. తను తీసిన సినిమా ఇంతటి విషాదానికి కారణమైందని తెలిసి దర్శకుడు కె. బాలచందర్ తీవ్రంగా కలత చెందారు. “ఈ సినిమా తీయడం నా జీవితంలో నేను చేసిన అతిపెద్ద తప్పు” అని ఆయన బహిరంగంగా వ్యాఖ్యానించారు. కళ అనేది జీవితాన్ని ప్రేమించేలా చేయాలి కానీ, ప్రాణాలు తీసుకునేలా చేయకూడదని ఆయన ఆవేదన వ్యక్తం చేస్తూ క్షమాపణలు కూడా చెప్పారు. నేటితరం సినిమాల విషయంలో కూడా ఇలాంటి చర్చలు జరుగుతూనే ఉన్నాయి. సినిమా ప్రభావాన్ని పాజిటివ్‌గా తీసుకోవాలే తప్ప, వెండితెరపై కనిపించే విషాదాన్ని నిజజీవితంలోకి అన్వయించుకోకూడదని మనకు నేర్పుతోంది.