Veera Shiva Reddy: కడప జిల్లాలో టీడీపీకి షాక్‌.. రేపే వైసీపీ గూటికి మాజీ ఎమ్మెల్యే

Veera Shiva Reddy: కడప జిల్లా కమలాపురంలో ఎన్నికల సమయంలో తెలుగుదేశం పార్టీకి షాక్‌ తగిలినట్టు అయ్యింది.. రేపు అనగా గురువారం రోజు పులివెందులలో ముఖ్యమంత్రి వైఎస్‌ జగన్మోహన్ రెడ్డి సమక్షంలో వైసీపీ తీర్థం పుచ్చుకునేందుకు సిద్ధం అయ్యారు మాజీ ఎమ్మెల్యే వీర శివారెడ్డి.. కమలాపురం టిక్కెట్ ఆశించి బంగపడ్డ వీర శివారెడ్డి.. టికెట్ రాకపోవడంతో టీడీపీని వీడి వైసీపీలో చేరేందుకు రంగం సిద్ధం చేసుకుంటున్నారు. కాగా, ఈ ఏడాది జనవరిలోనే టీడీపీ గూటికి చేరుకున్నారు క‌మ‌లాపురం నియోజకవర్గానికి చెందిన వీర‌శివారెడ్డి.. ఇప్పుడు తిరిగి వైసీపీలో చేరేందుకు రెడీ అయ్యారు.

Read Also: Salman Khan: కాల్పుల కేసులో నిందితుల్ని విచారించిన ఢిల్లీ పోలీసులు

తొలినాళ్లలో టీడీపీలోనే తన రాజ‌కీయ ప్రస్థానం ప్రారంభించారు వీరశివారెడ్డి.. 1994లో తొలిసారి టీడీపీ అభ్యర్థిగా క‌మ‌లాపురం నుంచి బరిలోకి దిగి ఎమ్మెల్యేగా విజ‌యం సాధించారు. త‌ర్వాత 1999 ఎన్నిక‌ల్లో కాంగ్రెస్ అభ్యర్థి ఎంవీ మైసూరారెడ్డి చేతిలో ఓటమి చవిచూడాల్సి వచ్చింది.. 2004లో టీడీపీ అభ్యర్థిగా మ‌ళ్లీ అదే స్థానం నుంచి పోటీ చేసినా విజయం వరించలేదు.. అయితే, 2009 ఎన్నిక‌ల నాటికి దివంగత వైఎస్ రాజశేఖరరెడ్డి సారథ్యంలోని కాంగ్రెస్ పార్టీలో చేరారు.. 2009 ఎన్నిక‌ల్లో కాంగ్రెస్ అభ్యర్థిగా అక్కడి నుంచే గెలిపొందారు. తర్వాత, ఏపీ పునర్విభజన, తదనంతర పరిణామాల నేపథ్యంలో 2014, 2019 ఎన్నికల్లో పోటీకి దూరంగా ఉండాల్సి వచ్చింది.. ఇక, 2019 ఎన్నికల సమయంలో వైసీపీలో చేరారు.. కానీ, తగినంత ప్రాధాన్యత దక్కడం లేదంటూ చాలా కాలంగా పార్టీ కార్యక్రమాలకు దూరంగా ఉంటూ వచ్చారు.. ఈ ఏడాది జనవరిలో సైకిల్‌ ఎక్కిన ఆయన.. కమలాపురం టికెట్‌ ఆశించారు.. అది సాధ్యం కాకపోవడంతో.. ఇప్పుడు మళ్లీ వైసీపీ గూటికి చేరేందుకు సిద్ధం అయ్యారు.