Kaleshwaram Temple News: పవిత్ర పుణ్యక్షేత్రం కాళేశ్వరంలో 2026 కార్తీక మాసోత్సవాలు ఘనంగా ప్రారంభమయ్యాయి. జయశంకర్ భూపాలపల్లి జిల్లాలోని శ్రీ కాళేశ్వర ముక్తీశ్వర స్వామి దేవస్థానంలోని శ్రీ బాలాలయం, శ్రీ ఆదిముక్తీశ్వర స్వామి ఆలయాల్లో ఈ రోజు నుంచి డిసెంబర్ 8 వరకు నెల రోజుల పాటు ప్రత్యేక పూజలు నిర్వహించనున్నట్లు ఆలయ ఉప ప్రధాన అర్చకులు పనకంటి ఫణీంద్ర శర్మ తెలిపారు. కార్తీక మాసం మొదటి రోజు కావడంతో తెల్లవారుజాము నుంచే తెలంగాణలోని పలు ప్రాంతాలతో పాటు మహారాష్ట్ర, ఛత్తీస్‌గఢ్‌ రాష్ట్రాల నుంచి భక్తులు పెద్ద సంఖ్యలో కాళేశ్వరానికి తరలివచ్చారు.
భక్తులు త్రివేణి సంగమం వద్ద గోదావరి నదిలో పవిత్ర స్నానాలు ఆచరించి.. గోదావరి మాతకు ప్రత్యేక పూజలు నిర్వహించారు. అనంతరం శ్రీ ఆదిముక్తీశ్వర స్వామి ఆలయంలో స్వామివారికి మారేడు దళాలు సమర్పించి అభిషేకాలు, విశేష పూజలు చేశారు. శ్రీ బాలాలయంలోని దేవతామూర్తుల ఉత్సవ విగ్రహాలను దర్శించుకున్నారు. మహిళలు ఆలయాల్లో కుంకుమార్చనలు నిర్వహించడంతో పాటు ఉసిరి చెట్టు వద్ద దీపాలు వెలిగించి ప్రదక్షిణలు చేశారు. కార్తీక మాసం సందర్భంగా ఆలయంలో నెల రోజుల పాటు ఆకాశ దీపం వెలిగించనున్నట్లు అర్చకులు ఫణీంద్ర శర్మ వెల్లడించారు.
ఈ నెల 13న నాగులచవితి, 23న వైకుంఠ చతుర్దశి సందర్భంగా శ్రీ ఆదిముక్తీశ్వర స్వామి ఆలయంలో రాత్రి లింగోద్భవ పూజ నిర్వహించనున్నట్లు అర్చకులు తెలిపారు. అలాగే 24న కార్తీక పౌర్ణమి సందర్భంగా సామూహిక సత్యనారాయణ వ్రతాలు నిర్వహించనున్నట్లు పేర్కొన్నారు. భక్తులు కార్తీక మాసంలో త్రివేణి సంగమం వద్ద పుణ్యస్నానాలు ఆచరించి, స్వామివారిని దర్శించుకోవాలని సూచించారు. ప్రతిరోజూ దీపారాధన చేయడంతో పాటు ఉసిరి చెట్టు వద్ద దీపాలు వెలిగించాలని కోరారు. ఇక కాళేశ్వర ఆలయ పునర్నిర్మాణ పనులు కొనసాగుతున్న నేపథ్యంలో స్థలాభావం కారణంగా ఈ ఏడాది శ్రీ ఆదిముక్తీశ్వర స్వామి ఆలయంలో నిర్వహించే లక్షపత్రి పూజలను రద్దు చేసినట్లు తెలిపారు. భక్తులు ఈ విషయాన్ని గమనించి ఆలయ అధికారులకు సహకరించాలని విజ్ఞప్తి చేశారు.