Kadapa Woman Murdered: కడప నగరంలో దారుణ ఘటన చోటుచేసుకుంది. ఎన్టీపీసీ పవర్‌ గ్రిడ్‌ ఎదురుగా ఓ మహిళ హత్యకు గురైంది. ప్రాథమిక సమాచారం ప్రకారం.. వివాహేతర సంబంధం నేపథ్యంలో ఈ హత్య జరిగినట్లు తెలుస్తోంది. అనుమానంతో ఓ వ్యక్తి తన ప్రియురాలిని గొంతు కోసి హత్య చేసిన అనంతరం.. తాను కూడా గొంతు కోసుకుని ఆత్మహత్యకు యత్నించినట్లు సమాచారం.
పోలీసులు తెలిపిన వివరాల ప్రకారం.. కడప నియోజకవర్గ పరిధిలోని సీకే దిన్నె మండలం ఎన్టీపీసీ సమీపంలో హత్యకు గురైన మహిళను షేక్‌ శంషాద్‌ బేగం (42)గా గుర్తించారు. ఆమెను శీను (31) అనే వ్యక్తి గొంతు కోసి దారుణంగా హత్య చేసినట్లు పోలీసులు తెలిపారు. మహిళపై దాడి చేసిన అనంతరం శీను కూడా గొంతు కోసుకుని ఆత్మహత్యకు ప్రయత్నించిచాడు. తీవ్రంగా గాయపడిన అతడిని స్థానికులు, పోలీసులు వెంటనే కడప రిమ్స్‌ ప్రభుత్వ ఆసుపత్రికి తరలించారు. ప్రస్తుతం అతడి పరిస్థితి విషమంగా ఉన్నట్లు తెలుస్తోంది.
సమాచారం అందుకున్న పోలీసులు ఘటనా స్థలానికి చేరుకుని పరిశీలించారు. కేసు నమోదు చేసి దర్యాప్తు ప్రారంభించారు. అసలు హత్యకు దారితీసిన కారణాలేంటి?.. వీరిద్దరి మధ్య ఉన్న సంబంధం ఏమిటి?.. అనుమానానికి దారితీసిన పరిస్థితులు ఏంటి? అనే కోణాల్లో పోలీసులు విచారణ చేస్తున్నారు. ఘటనకు సంబంధించి పూర్తి వివరాలు పోలీసుల దర్యాప్తులో వెల్లడికావాల్సి ఉంది. ప్రస్తుతం కడపలో చోటుచేసుకున్న ఈ ఘటన స్థానికంగా తీవ్ర కలకలం రేపింది.