Inorbit Mall: ఏపీ వాసులకు భారీ శుభవార్త.. అక్కడ ఇనార్బిట్ మాల్ ప్రారంభం..

విశాఖపట్నం నగర వాసులకు శుభవార్త. నగర నడిబొడ్డున ఉన్న సాలిగ్రామపురంలో ‘ఇన్ఆర్బిట్ మాల్’ అట్టహాసంగా తన ప్రయాణాన్ని ప్రారంభించింది. దాదాపు 14 లక్షల చదరపు అడుగుల విస్తీర్ణంలో నిర్మించిన ఈ మాల్, ఆంధ్రప్రదేశ్‌లోనే అతిపెద్ద షాపింగ్ మాల్‌గా సరికొత్త రికార్డు సృష్టించింది. ఈ మాల్‌లో షాపింగ్ ప్రియుల కోసం ఫ్యాషన్, పాదరక్షలు, నగలు, వాచీలు, ఎలక్ట్రానిక్స్, సౌందర్య సాధనాలకు సంబంధించిన 350కి పైగా జాతీయ, అంతర్జాతీయ బ్రాండ్లు అందుబాటులో ఉన్నాయి. ముఖ్యంగా షాపర్స్ స్టాప్, H అండ్ M, ప్యాంటలూన్స్, శామ్సంగ్, మలబార్ గోల్డ్ వంటి ప్రముఖ సంస్థలు తమ స్టోర్లను ఇక్కడ ఏర్పాటు చేశాయి.

సినిమా ప్రియుల కోసం ఇక్కడ ప్రపంచ స్థాయి సౌకర్యాలతో కూడిన 8 స్క్రీన్ల మల్టీప్లెక్స్ ఉంది. ఇందులో ముఖ్యంగా AAA (ఏషియన్ అల్లు అర్జున్) సినిమాస్ ప్రత్యేక ఆకర్షణగా నిలవనుంది. పిల్లల కోసం 5 రకాల ఎంటర్టైన్మెంట్ సెంటర్లు, రుచికరమైన ఆహారాన్ని అందించే ఫుడ్ కోర్ట్ , రెస్టారెంట్లు ఇక్కడ ఉన్నాయి.

Also Read:Ganja Murders: మత్తులో మృగాళ్లు.. భాగ్యనగరంలో గంజాయి బ్యాచ్‌ల వీరంగం.. రెండు రోజుల్లో ఇద్దరి బలి!

ఈ మాల్ కేవలం షాపింగ్ కోసమే కాకుండా.. ప్రజలు ఒకచోట చేరి సరదాగా గడిపేలా రూపొందించబడింది. వాహనాల పార్కింగ్ కోసం ఏకంగా 7 అంతస్తులను కేటాయించారు. అలాగే.. వ్యాయామం కోసం 1.1 కిలోమీటర్ల పొడవైన జోగింగ్ ట్రాక్, పెంపుడు జంతువుల కోసం ప్రత్యేకంగా ‘పెట్ పార్క్’, నగర అందాలను చూసేందుకు వీలుగా పైకప్పు మీద టెర్రస్ డెక్ ఏర్పాటు చేశారు. పర్యావరణ హితంగా నిర్మించినందుకు ఈ మాల్‌కు ‘లీడ్ (LEED) గోల్డ్ సర్టిఫికేషన్’ లభించింది. అలాగే భద్రతా ప్రమాణాల విషయంలో బ్రిటిష్ కౌన్సిల్ నుండి అవార్డును కూడా అందుకుంది.

కె. రహేజా కార్ప్ ప్రతినిధులు నీల్ రహేజా, రజనీష్ మహాజన్ మాట్లాడుతూ.. విశాఖ వంటి వేగంగా అభివృద్ధి చెందుతున్న నగరంలో ఈ మాల్‌ను ప్రారంభించడం సంతోషంగా ఉందని, ఇది ప్రజలకు ఒక సరికొత్త జీవనశైలిని అందిస్తుందని తెలిపారు.