6500mAh బ్యాటరీ, 144Hz AMOLED డిస్‌ప్లే , 90W ఛార్జింగ్‌.. ఐఫోన్ 17 ప్రో మాక్స్ లా కనిపించే ఫోన్..

ఇన్ఫినిక్స్ సంస్థ తన ప్రీమియం స్మార్ట్‌ఫోన్ ‘NOTE 60 Pro’ను భారత మార్కెట్లో రెండు కొత్త ఆకర్షణీయమైన రంగుల్లో విడుదల చేసింది. ఐఫోన్ 17 ప్రో మోడల్‌ను పోలి ఉండే డిజైన్‌తో వచ్చిన ఈ ఫోన్, ఇప్పుడు ‘మిస్ట్ టైటానియం’, ‘ఫ్రాస్ట్ సిల్వర్’ అనే రెండు మెటాలిక్ ఫినిషింగ్ కలర్ వేరియంట్లలో లభిస్తుంది. ఈ కొత్త రంగులతో కలిపి ఈ ఫోన్ ప్రారంభ ధర రూ.33,999గా నిర్ణయించారు. ఇది ఫ్లిప్‌కార్ట్, ఆఫ్‌లైన్ స్టోర్లలో కొనుగోలుకు అందుబాటులో ఉంది.

ప్రధాన ఫీచర్లు,స్పెసిఫికేషన్లు..
క్వాల్‌కామ్ స్నాప్‌డ్రాగన్ 7s Gen 4 ప్రాసెసర్‌తో వచ్చిన మొదటి ఇన్ఫినిక్స్ ఫోన్ ఇది. గేమింగ్ సమయంలో ఫోన్ వేడెక్కకుండా ఉండటానికి ఇందులో ‘3D IceCore VC కూలింగ్ సిస్టమ్’ అందించారు. ఈ ఫోన్‌లో 6.78 ఇంచుల 1.5K AMOLED డిస్‌ప్లే ఉంది. ఇది 144Hz రీఫ్రెష్ రేట్, 4500 నిట్స్ గరిష్ట బ్రైట్‌నెస్‌ను సపోర్ట్ చేస్తుంది. కెమెరా మాడ్యూల్ చుట్టూ 288 LED పిక్సెల్స్ ఉంటాయి. ఇవి కాల్స్, మెసేజ్‌లు, ఛార్జింగ్, వాతావరణ సమాచారాన్ని నోటిఫికేషన్లుగా చూపిస్తాయి.

ఇందులో భారీ 6500mAh బ్యాటరీ ఉంది. దీనికోసం 90W ఫాస్ట్ ఛార్జింగ్, 30W వైర్‌లెస్ ఛార్జింగ్ సపోర్ట్ లభిస్తుంది. ఫోన్ వెనుక భాగంలో OIS (ఆప్టికల్ ఇమేజ్ స్టెబిలైజేషన్) సపోర్ట్ ఉన్న 50MP ప్రధాన కెమెరాతో పాటు అల్ట్రా-వైడ్ కెమెరా కూడా ఉంది. ఇది 4K వీడియో రికార్డింగ్, AI ఎడిటింగ్ టూల్స్‌ను కలిగి ఉంది. ఈ ఫోన్ ఆండ్రాయిడ్ 16 ఆధారిత XOS 16 పై నడుస్తుంది. దీనికి 3 ఏళ్ల ఆండ్రాయిడ్ అప్‌డేట్స్, 5 ఏళ్ల సెక్యూరిటీ అప్‌డేట్స్ ఇస్తామని కంపెనీ హామీ ఇచ్చింది.

ఈ ఫోన్ కొనుగోలు చేసే వారికి రూ.3,999 విలువైన మ్యాగ్‌పవర్ స్పీకర్ ఉచితంగా లభిస్తుంది. అలాగే రూ.35,100 విలువచేసే 18 నెలల ‘గూగుల్ జెమిని ప్రో’ సబ్‌స్క్రిప్షన్, 5TB గూగుల్ క్లౌడ్ స్టోరేజ్ ఉచితంగా ఇస్తున్నారు. వీటితో పాటు ఒక సంవత్సరం ఉచిత స్క్రీన్ రీప్లేస్‌మెంట్, బ్యాంక్ ఆఫర్లు మరియు నో-కాస్ట్ EMI సౌకర్యాలు కూడా ఉన్నాయి.