India Lowest T20I Scores: 76 పరుగులకే కుప్పకూలిన టీమిండియా.. చరిత్రలో భారత్‌ సాధించిన అత్యల్ప స్కోర్లు ఇవే.!

India Lowest T20I Scores: టీ20 క్రికెట్‌లో అత్యంత భారీ బ్యాటింగ్ లైనప్‌ లలో టీమిండియా ఒకటి. 2024, 2026 వరుస టీ20 ప్రపంచకప్‌లు గెలవడంతో పాటు మధ్యలో ఆసియా కప్ టీ20 టైటిల్‌ను కూడా కైవసం చేసుకుని ఈ ఫార్మాట్‌లో భారత్ తన ఆధిపత్యాన్ని చాటుకుంది. అయితే ఎంత బలమైన జట్టైనా కొన్ని సందర్భాల్లో తీవ్ర వైఫల్యాలను ఎదుర్కోవాల్సి వస్తుంది. ఇంగ్లండ్‌తో నాటింగ్‌హామ్‌లో జరిగిన మూడో టీ20లో భారత్ కేవలం 76 పరుగులకే ఆలౌట్ కావడంతో టీ20 చరిత్రలో మరో చెత్త రికార్డు నమోదైంది.

202 పరుగుల భారీ లక్ష్యాన్ని ఛేదించే క్రమంలో భారత బ్యాటర్లు పూర్తిగా విఫలమయ్యారు. అభిషేక్ శర్మ, వైభవ్ సూర్యవంశీ, ఇషాన్ కిషన్, కెప్టెన్ శ్రేయస్ అయ్యర్, అక్షర్ పటేల్ పవర్‌ప్లేలోనే పెవిలియన్ చేరడంతో మ్యాచ్ పూర్తిగా ఇంగ్లండ్ చేతుల్లోకి వెళ్లిపోయింది. చివరకు భారత్ 11.4 ఓవర్లలో 76 పరుగులకే ఆలౌట్ అయి 125 పరుగుల భారీ తేడాతో ఓడిపోయింది. టీ20 అంతర్జాతీయ క్రికెట్‌లో ఇది భారత్ రెండో అత్యల్ప స్కోరుగా నిలిచింది.

టీ20ల్లో భారత్ అత్యల్ప స్కోర్లు:

74 vs ఆస్ట్రేలియా (మెల్‌బోర్న్, 2008):

టీ20 ప్రపంచకప్ గెలిచిన కొద్ది నెలల తర్వాత మెల్‌బోర్న్ క్రికెట్ గ్రౌండ్‌లో ఆస్ట్రేలియాతో జరిగిన మ్యాచ్‌లో భారత్ కేవలం 74 పరుగులకే ఆలౌట్ అయింది. నాథన్ బ్రాకెన్ నేతృత్వంలోని ఆస్ట్రేలియా బౌలర్లు భారత బ్యాటింగ్‌ను కుప్పకూల్చగా.. ఆతిథ్య జట్టు తొమ్మిది వికెట్ల తేడాతో ఘన విజయం సాధించింది.

76 vs ఇంగ్లండ్ (నాటింగ్‌హామ్, 2026):

ఇంగ్లండ్‌తో మూడో టీ20లో టీమిండియా 76 పరుగులకే ఆలౌట్ కావడం భారత టీ20 చరిత్రలో రెండో అత్యల్ప స్కోరుగా నమోదైంది. ఈ ఓటమితో ఐదు మ్యాచ్‌ల సిరీస్‌లో భారత్ 0-2తో వెనుకబడింది.

79 vs న్యూజిలాండ్ (నాగ్‌పూర్, 2016):

2016 టీ20 ప్రపంచకప్‌లో నాగ్‌పూర్ వేదికగా న్యూజిలాండ్ నిర్దేశించిన 127 పరుగుల లక్ష్యాన్ని ఛేదించే క్రమంలో భారత్ 79 పరుగులకే కుప్పకూలింది. మిచెల్ సాంట్నర్ (4 వికెట్లు), ఇష్ సోధి (3 వికెట్లు) భారత బ్యాటర్లను కట్టడి చేశారు. టీ20 ప్రపంచకప్ చరిత్రలో భారత్‌కు అత్యల్ప స్కోరులలో ఇదొకటి.

81/8 vs శ్రీలంక (కొలంబో, 2021):

2021లో శ్రీలంకతో జరిగిన మూడో టీ20లో భారత్ 20 ఓవర్లలో 8 వికెట్ల నష్టానికి కేవలం 81 పరుగులే చేసింది. ఆ మ్యాచ్‌లో కుల్దీప్ యాదవ్ 23 పరుగులతో టాప్ స్కోరర్‌గా నిలవడం విశేషం. వనిందు హసరంగా నాలుగు వికెట్లు తీసి శ్రీలంక విజయంలో కీలక పాత్ర పోషించాడు.

92 vs దక్షిణాఫ్రికా (కటక్, 2015):

2015లో కటక్‌లో దక్షిణాఫ్రికాతో జరిగిన టీ20లో భారత్ 92 పరుగులకే ఆలౌట్ అయింది. కగిసో రబాడా, క్రిస్ మోరిస్ ధాటికి భారత టాప్ ఆర్డర్ కుప్పకూలింది. రోహిత్ శర్మ, సురేశ్ రైనా కలిసి చేసిన 44 పరుగులే జట్టుకు ప్రధాన ఆధారంగా నిలిచాయి. చివరకు భారత్ ఆ మ్యాచ్‌లో ఆరు వికెట్ల తేడాతో ఓడిపోయింది.

టీ20 ప్రపంచకప్ గెలిచిన కొద్ది నెలల్లోనే భారత బ్యాటింగ్ ఈ స్థాయిలో కుప్పకూలడం అభిమానులను నిరాశకు గురిచేస్తుంది. వరుసగా కీలక వికెట్లు కోల్పోవడం, భారీ లక్ష్యాల ఛేదనలో ఒత్తిడిని తట్టుకోలేకపోవడం జట్టుకు ప్రధాన సమస్యగా మారింది.