layoffs: అకస్మాత్తుగా మీటింగ్ ఇన్విటేషన్.. 5 నిమిషాల్లో 80 మంది భారతీయుల ఉద్యోగాలు ఊస్ట్..!

layoffs: సాయంత్రం షిఫ్ట్‌లో ప్రశాంతంగా పని చేసుకుంటున్న ఉద్యోగులకు హఠాత్తుగా ఒక మీటింగ్ ఇన్విటేషన్ వచ్చింది. ఆన్-లైన్‌లో లాగిన్ అయిన కొద్ది నిమిషాల్లోనే వారి జీవితాలు తలకిందులైపోయాయి. ఒక అమెరికన్ ఫైనాన్షియల్ సంస్థలో పనిచేస్తున్న భారతీయ కస్టమర్ సర్వీస్ టీమ్‌కు కేవలం ఐదు నిమిషాల గూగుల్ మీట్ కాల్‌తో ఊహించని షాక్ తగిలింది. ఈ సంఘటనను ఆ టీమ్‌లో పనిచేసిన ఓ ఉద్యోగి సోషల్ మీడియా ప్లాట్‌ఫామ్ రెడ్డిట్ (Reddit) వేదికగా పంచుకున్నారు. ఆయన తెలిపిన వివరాల ప్రకారం.. అమెరికాకు చెందిన ఒక ప్రముఖ బ్యాంక్‌కు సంబంధించి భారత్‌లో ఉన్న కస్టమర్ సపోర్ట్ టీమ్ మొత్తాన్ని ఒక్క దెబ్బకు తొలగించారు. ఆ రోజు సాయంత్రం 6:30 గంటల షిఫ్ట్‌లో పనిచేస్తున్న ఉద్యోగులకు రాత్రి 9:30 గంటల సమయంలో అత్యవసరంగా ఒక గూగుల్ మీట్ లింక్ పంపించారు. తీరా మీటింగ్‌లో జాయిన్ అయ్యాక, భారతీయ కస్టమర్ సర్వీస్ టీమ్ మొత్తాన్ని ఉద్యోగాల నుంచి తొలగిస్తున్నట్లు బాంబు పేల్చారు.

కేవలం ఆ ఐదు నిమిషాల కాల్‌తో ఏకంగా 80 మంది ఉద్యోగులు వీధిన పడ్డారు. “అందరూ ఒక్కసారిగా ఉద్యోగాలు కోల్పోయారు.. ఆ ఒక్క ఐదు నిమిషాల కాల్ 80 కుటుంబాల జీవితాలను రోడ్డున పడేసింది. ఎప్పుడు పడితే అప్పుడు బయటకు తోసేసే ఇలాంటి కార్పొరేట్ కంపెనీల కోసం రాత్రింబవళ్లు కష్టపడి పనిచేసినందుకు చాలా బాధగా ఉంది” అని ఆ ఉద్యోగి తన ఆవేదనను వెళ్లగక్కారు. ఉన్నపళంగా ఉద్యోగం ఊడిపోవడంతో ఇప్పుడు మరో ఉద్యోగం ఎలా వెతుక్కోవాలో పాలుపోవడం లేదని, ఈ పరిస్థితి చాలా దారుణంగా ఉందంటూ లబోదిబోమన్నారు. అసలు అంతమందిని ఒక్కసారిగా ఎందుకు తీసేశారనే దానికి సమాధానంగా.. భారతీయ టీమ్ నుంచి తమకు అనుకున్నంత స్థాయిలో అవుట్‌పుట్ (ఫలితాలు) రావడం లేదని కంపెనీ భావించినట్లు ఆ ఉద్యోగి తెలిపారు. అమెరికా టీమ్‌తో పోలుస్తూ మన ఉద్యోగుల పనితీరును తక్కువ చేసి చూపడంపై ఆయన తీవ్ర అసంతృప్తి వ్యక్తం చేశారు. అలాగే ఇక్కడి ఉద్యోగులు తమ ఉద్యోగ భద్రతను దృష్టిలో ఉంచుకునే పనిచేశారని పేర్కొన్నారు. అయితే ఈ లేఆఫ్స్‌కు సంబంధించి ఆ అమెరికన్ సంస్థ నుంచి ఇప్పటివరకు ఎలాంటి అధికారిక ప్రకటనగానీ, వివరణగానీ రాలేదు. పూర్తి వివరాలు అధికారికంగా తెలియాల్సి ఉంది. కంపెనీలు లేఆఫ్స్ ప్రకటించేటప్పుడు అనుసరిస్తున్న ఇటువంటి క్రూరమైన పద్ధతులు, ఉద్యోగులకు ఇచ్చే మద్దతుపై ఈ ఉదంతం తీవ్రమైన చర్చకు దారితీసింది.