Women’s Hockey World Cup 2026: మహిళల హాకీ ప్రపంచకప్ 2026లో భారత మహిళల జట్టు అద్భుత ప్రదర్శనతో తదుపరి రౌండ్కు అర్హత సాధించింది. ఇంగ్లాండ్తో గురువారం జరిగిన పూల్-డీ మ్యాచ్ 0-0తో డ్రాగా ముగిసింది. ఈ ఒక్క పాయింట్తో భారత్ పూల్లో రెండో స్థానాన్ని దక్కించుకుని రెండో రౌండ్లోకి ప్రవేశించింది. అయితే, మ్యాచ్ ప్రారంభం నుంచే భారత్ గోల్ కోసం ప్రయత్నించింది. పలు అవకాశాలు లభించినప్పటికీ వాటిని గోల్స్గా మలచలేకపోయింది. మరోవైపు ఇంగ్లాండ్ చివరి దశలో తీవ్ర ఒత్తిడి తెచ్చినా భారత రక్షణ శ్రేణి పటిష్టంగా నిలిచింది. గోల్కీపర్ బిచు దేవి కీలక సేవ్స్తో జట్టును కాపాడారు.
భారత్ టోర్నీలో తన ప్రయాణాన్ని చైనాతో 2-2 డ్రాతో ప్రారంభించింది. అనంతరం దక్షిణాఫ్రికాపై 6-1తో ఘన విజయం సాధించింది. ఇంగ్లాండ్తో డ్రాతో భారత్ పూల్-డీలో అజేయంగా నిలిచి ఐదు పాయింట్లతో రెండో స్థానంలో నిలిచింది. చైనా ఏడు పాయింట్లతో అగ్రస్థానంలో ఉంది. ఇక, తదుపరి రౌండ్లో భారత జట్టు మరింత కఠినమైన సవాళ్లను ఎదుర్కోనుంది. స్జోర్డ్ మారిజ్నే నేతృత్వంలోని భారత జట్టు ఇదే జోరును కొనసాగించి ప్రపంచకప్ టైటిల్ రేసులో ముందుకు సాగాలని అభిమానులు ఆశిస్తున్నారు.