India vs New Zealand: న్యూజిలాండ్‌తో జరిగిన నాలుగో టీ20 మ్యాచ్ టీమిండియాకు, ముఖ్యంగా కెప్టెన్ శ్రేయస్ అయ్యర్‌కు తీవ్ర నిరాశను మిగిల్చింది. ఇప్పటికే తొలి మూడు మ్యాచ్‌లలో వరుస విజయాలతో 3-0 తేడాతో సిరీస్‌ను దక్కించుకున్న భారత్, ఆక్లాండ్ మైదానంలో మాత్రం ఘోరంగా బొక్కబోర్లా పడింది. ఏకంగా 87 పరుగుల భారీ తేడాతో న్యూజిలాండ్ చేతిలో ఘోర పరాజయం పాలైంది. ఈ ఓటమి టీ20 క్రికెట్ చరిత్రలోనే భారత జట్టుకు పరుగుల పరంగా రెండో అతిపెద్ద పరాజయంగా నమోదు కావడం గమనార్హం. కెప్టెన్‌గా జట్టును సమర్థవంతంగా నడిపించాల్సిన శ్రేయస్ అయ్యర్‌కు ఇది నిజంగా మర్చిపోలేని రోజే అని చెప్పాలి.
బ్యాటింగ్‌లో అయ్యర్ వరుసగా వైఫల్యం చెందుతుండడం జట్టును తీవ్రంగా కలవరపెడుతోంది. కీలకమైన సమయంలో బాధ్యతాయుతంగా ఆడి జట్టును గట్టెక్కించాల్సిన కెప్టెన్, తక్కువ పరుగులకే అవుట్ కావడం ఇన్నింగ్స్‌ను దెబ్బతీసింది. మరోవైపు భారత బౌలర్లు సైతం దారుణంగా విఫలమై ధారాళంగా పరుగులు సమర్పించుకోవడంతో న్యూజిలాండ్ భారీ స్కోరు నమోదు చేసింది. 2026 నాటింగ్‌హామ్‌లో ఇంగ్లాండ్‌పై నమోదైన 125 పరుగుల ఓటమి తర్వాత, టీ20లలో భారత్‌కు ఇదే అత్యంత దారుణమైన రికార్డు కావడం అయ్యర్ కెప్టెన్సీకి ఒక చేదు అనుభవంగా మిగిలిపోనుంది.
ఈ భారీ ఓటమి జట్టును తీవ్రంగా దెబ్బతీసినప్పటికీ, సిరీస్ ఇప్పటికే భారత్ వశమవ్వడం ఒక్కటే ఊరటనిచ్చే అంశం. అయితే బౌలింగ్ విభాగంలో ఉన్న లోపాలను సవరించుకోవడం, కెప్టెన్ శ్రేయస్ అయ్యర్ తిరిగి ఫామ్‌లోకి రావడం అత్యవసరం. ఈ చేదు జ్ఞాపకాన్ని వెనక్కి నెట్టి, ఆదివారం హమిల్టన్‌లో జరగనున్న ఐదో చివరి టీ20 మ్యాచ్‌లో విజయంతో సిరీస్‌ను ఘనంగా ముగించాలని టీమిండియా పట్టుదలతో ఉంది. మేనేజ్‌మెంట్ కూడా జట్టు లోపాలను త్వరితగతిన సరిదిద్ది ఆఖరి పోరుకు బలమైన తుది జట్టుతో బరిలోకి దిగాల్సి ఉంది.
ఇక నిన్నటి మ్యాచ్ విషయానికి వస్తే.. మొదట టాస్ గెలిచి బౌలింగ్ ఎంచుకున్న భారత్‌కు మయాంక్ యాదవ్ అదిరిపోయే ఆరంభాన్నిచ్చాడు. తొలి ఓవర్లోనే టిమ్ సైఫర్ట్‌ను, ఆ తర్వాత డేరియల్ మిచెల్‌ను ఔట్ చేశాడు. అయితే గ్లెన్ ఫిలిప్స్ ఈడెన్ పార్క్ మైదానంలో పరుగుల వరద పారించాడు. కేవలం 49 బంతుల్లోనే 6 ఫోర్లు, 10 సిక్సర్లతో 107 పరుగులు సాధించి కివీస్ జట్టు అత్యధిక టీ20 స్కోరు (259/7) నమోదు చేయడంలో కీలక పాత్ర పోషించాడు. అతనికి తోడుగా మైఖేల్ బ్రేస్‌వెల్ కేవలం 25 బంతుల్లోనే 65 పరుగులు చేసి విధ్వంసం సృష్టించాడు. వీరిద్దరూ ఐదో వికెట్‌కు కేవలం 40 బంతుల్లోనే 115 పరుగులు జోడించారు. నితీష్ కుమార్ రెడ్డి వేసిన 16వ ఓవర్లో ఫిలిప్స్ వరుసగా నాలుగు సిక్సర్లు బాది మొత్తం 32 పరుగులు పిండుకున్నాడు. భారత బౌలర్లలో అర్ష్‌దీప్ సింగ్ పొదుగా బౌలింగ్ చేసి కెప్టెన్ మిచెల్ సాంట్నర్‌ను ఔట్ చేశాడు. ఈ వికెట్‌తో అర్ష్‌దీప్ అంతర్జాతీయ టీ20లలో 150 వికెట్ల మైలురాయిని చేరుకున్న తొలి భారత బౌలర్‌గా, ప్రపంచంలో తొమ్మిదో ఆటగాడిగా నిలిచాడు. అంతేకాకుండా, ఫుల్ మెంబర్ దేశానికి చెందిన బౌలర్‌గా ఒకే కేలండర్ ఇయర్‌లో అత్యధిక వికెట్లు తీసిన రికార్డును తన పేరు మీదకు మార్చుకున్నాడు. మయాంక్ యాదవ్ 3 వికెట్లు తీయగా, నితీష్ కుమార్ రెడ్డి నాలుగు ఓవర్లలో ఏకంగా 64 పరుగులు ఇచ్చి నిరాశపరిచాడు.
భారీ లక్ష్య ఛేదనలో బరిలోకి దిగిన భారత్‌కు ఆదిలోనే భారీ షాకులు తగిలాయి. సంజు శాంసన్ రెండో బంతికే ఔట్ కాగా.. తాజాగా జట్టులోకి వచ్చిన ఇషాన్ కిషన్ సైతం ఖాతా తెరవకుండానే పెవిలియన్ చేరాడు. జాకబ్ డఫీ తొలి ఓవర్లోనే ఈ రెండు వికెట్లు తీసి కివీస్‌కు డ్రీమ్ స్టార్ట్ ఇప్పించాడు. అభిషేక్ శర్మ 27 పరుగులు చేసి వేగంగా ఆడటానికి ప్రయత్నించినా మాథ్యూ ఫిషర్ బౌలింగ్‌లో వెనుదిరిగడాడు. కెప్టెన్ శ్రేయస్ అయ్యర్ మరోసారి దారుణంగా విఫలమయ్యాడు. పవర్‌ప్లేలోనే ఆడం మిల్నే బౌలింగ్‌లో కేవలం 22 పరుగులు చేసి ఔటయ్యాడు. ఈ వైఫల్యంతో అంతర్జాతీయ టీ20లలో అర్ధశతకం సాధించలేకపోయిన అతని నిరీక్షకత ఎనిమిది ఇన్నింగ్స్‌లకు చేరింది.
అనంతరం నితీష్ కుమార్ రెడ్డి (30), అక్షర్ పటేల్ (35) ఇన్నింగ్స్‌ను చక్కదిద్దే ప్రయత్నం చేసినా, మిచెల్ సాంట్నర్ ఒకే ఓవర్లో వీరిద్దరినీ ఔట్ చేసి భారత్‌ను కోలుకోలేని దెబ్బతీశాడు. లోయర్ ఆర్డర్‌లో వైస్ కెప్టెన్ తిలక్ వర్మ అజేయంగా పోరాడి జట్టులో అత్యధికంగా 35 పరుగులు చేసినా, అప్పటికే మ్యాచ్ భారత్ చేజారిపోయింది. చివరికి నిర్ణీత 20 ఓవర్లలో 9 వికెట్ల నష్టానికి 172 పరుగులు మాత్రమే చేయగలిగింది. ఈ ఏడాది భారత్ 250 పరుగులకు పైగా స్కోరును ప్రత్యర్థికి ఇవ్వడం ఇది మూడోసారి కావడం విశేషం. 2026కి ముందు ఎప్పుడూ ప్రత్యర్థికి ఈ స్థాయిలో పరుగులు సమర్పించని భారత్, గత నాలుగు నెలల్లో అయ్యర్ కెప్టెన్సీలోనే ఇలాంటి మూడు భారీ స్కోర్లను ఇవ్వడం గమనార్హం.