Jobs Growth: భారతదేశ వైట్-కాలర్ ఉద్యోగ మార్కెట్ ఫిబ్రవరిలో గణనీయమైన వృద్ధిని నమోదు చేసింది. Naukri.com విడుదల చేసిన తాజా Naukri JobSpeak Index నివేదిక ప్రకారం, ఫిబ్రవరి 2026లో నియామకాలు గత సంవత్సరం ఇదే కాలంతో పోలిస్తే 12 శాతం పెరిగాయి. జాబ్స్పీక్ ఇండెక్స్ 3,233 పాయింట్లకు చేరుకోగా, గత ఏడాది ఫిబ్రవరిలో ఇది 2,890 పాయింట్లుగా ఉంది. జనవరి నుంచి ఫిబ్రవరి వరకు నెలవారీ వృద్ధి 23 శాతంగా నమోదైంది. సాధారణంగా ఈ కాలంలో 13–16 శాతం వృద్ధి మాత్రమే కనిపిస్తుందని నివేదిక పేర్కొంది.
ఐటీ రంగం పుంజుకుంది
ఫిబ్రవరి 2026లో ఐటీ రంగంలో నియామకాలు గతంతో పోలిస్తే 6 శాతానికి పైగా పెరిగాయి. ఫ్రెషర్ల నియామకాలు కూడా 8 శాతం వృద్ధిని నమోదు చేశాయి. భారతీయ బహుళజాతి ఐటీ కంపెనీలు ప్రధాన చోదకశక్తిగా నిలిచాయి. ఈ సంస్థల్లో నియామకాలు 55 శాతం పెరిగినట్లు నివేదిక వెల్లడించింది.
AI/ML పాత్రలకు భారీ డిమాండ్
ఆర్టిఫిషియల్ ఇంటెలిజెన్స్, మెషిన్ లెర్నింగ్ (AI/ML) పాత్రల నియామకాలు గణనీయంగా పెరిగాయి.
– ఐటీ రంగంలో AI/ML నియామకాలు 40 శాతం పెరిగాయి
– మొత్తం మీద AI/ML పాత్రలు 49 శాతం వృద్ధి సాధించాయి
– భారతీయ బహుళజాతి సంస్థలు AI/ML నియామకాలను 82 శాతం పెంచాయి
– విదేశీ MNCలు 43 శాతం పెంపును నమోదు చేశాయి
– ఇది దేశీయ సంస్థలు ఆధునిక సాంకేతికత స్వీకరణలో ముందంజలో ఉన్నాయని సూచిస్తోంది.
ఫ్రెషర్లు, హై-సాలరీ జాబ్స్కు డిమాండ్
ఫ్రెషర్ల నియామకాలు ఏటా 17 శాతం పెరిగాయి. రూ. 20 లక్షల వార్షిక వేతన బ్యాండ్లో ఉద్యోగాల డిమాండ్ 23 శాతం పెరిగింది. ఇది ఎంట్రీ-లెవల్ మరియు హై-వాల్యూ టాలెంట్ విభాగాల్లో బలాన్ని ప్రతిబింబిస్తోంది. మరోవైపు.. ఐటీయేతర రంగాల్లో కూడా నియామకాలు పెరిగాయి.. భీమా – 28 శాతం, BPO/ITES – 22 శాతం, రియల్ ఎస్టేట్ – 19 శాతం, హాస్పిటాలిటీ/ట్రావెల్ – 15 శాతం, రిటైల్ – 14 శాతం.. ఇలా ఫిబ్రవరి 2026లో భారతీయ MNCలు మొత్తం నియామకాలను 24 శాతం విస్తరించాయి.
నౌక్రీ చీఫ్ బిజినెస్ ఆఫీసర్ పవన్ గోయల్ ప్రకారం, ఐటీ నియామకాలు అర్థవంతంగా కోలుకుంటున్నాయి. AI ప్రతిభపై పెట్టుబడులు పెరుగుతుండటంతో, కొత్త ఆర్థిక సంవత్సరానికి బలమైన వేగం కనిపిస్తోంది. భారత ఉద్యోగ మార్కెట్లో తిరిగి ఉత్సాహం నెలకొన్నట్లు తాజా నివేదిక స్పష్టం చేస్తోంది.
