Trains: రైల్వే ప్రయాణికులకు శుభవార్త.. ఇక నుంచి ఆ ప్రాంతాలకు వీక్లీ ఎక్స్‌ప్రెస్ ట్రైన్స్..

ట్రైన్లలో ప్రయాణించే వారికి రైల్వే శాఖ మరో అద్భుతమైన వార్తను అందించింది. ముఖ్యంగా తెలంగాణ నుంచి రాజస్థాన్ వెళ్లే ప్రయాణికుల రద్దీని దృష్టిలో ఉంచుకుని దక్షిణ మధ్య రైల్వే ఒక కీలక నిర్ణయం తీసుకుంది. హైదరాబాద్ , జైపూర్ నగరాల మధ్య కొత్తగా ఒక వీక్లీ ఎక్స్‌ప్రెస్ రైలును అందుబాటులోకి తీసుకువచ్చింది. కేంద్ర రైల్వే మంత్రిత్వ శాఖ అనుమతితో ఈ మార్గంలో నడుస్తున్న ప్రత్యేక రైలును ఇకపై శాశ్వత ప్రాతిపదికన సాధారణ రైలుగా మారుస్తూ ఉత్తర్వులు జారీ చేసింది. దీనివల్ల ప్రతి వారం సొంత ఊర్లకు, వ్యాపార పనుల నిమిత్తం ప్రయాణించే వేలాది మంది ప్రయాణికులకు సీట్ల రిజర్వేషన్ పరంగా ఎంతో ఊరట లభించనుంది.

హైదరాబాద్ – జైపూర్ వీక్లీ ఎక్స్‌ప్రెస్ సమయాలు..
ఈ సరికొత్త వీక్లీ రైలు సర్వీసుల వివరాలను అధికారులు అధికారికంగా వెల్లడించారు. భాగ్యనగరం నుంచి జైపూర్ వెళ్లే రైలు (నెంబర్ 17079) ప్రతి వారం శుక్రవారం రాత్రి 07:50 గంటలకు హైదరాబాద్ స్టేషన్ నుండి బయలుదేరుతుంది. ఇది శనివారం రోజంతా ప్రయాణించి, ఆదివారం తెల్లవారుజామున 05:25 గంటలకు జైపూర్ చేరుకుంటుంది.

తిరుగు ప్రయాణంలో జైపూర్ నుంచి హైదరాబాద్ వచ్చే రైలు (నెంబర్ 17080) ప్రతి ఆదివారం మధ్యాహ్నం 03:30 గంటలకు జైపూర్‌లో స్టార్ట్ అవుతుంది. ఈ రైలు మంగళవారం ఉదయం 05:00 గంటలకు ప్రయాణికులను సురక్షితంగా హైదరాబాద్‌కు చేరుస్తుంది. వారంతపు రోజుల్లో ఈ రైలు అందుబాటులో ఉండటం వల్ల ఉద్యోగులు, పర్యాటకులకు ఎంతో అనుకూలంగా మారనుంది.

ఈ జైపూర్ ఎక్స్‌ప్రెస్ రెండు రాష్ట్రాల మధ్య ఉన్న పలు ముఖ్యమైన పట్టణాలను కలుపుతూ సాగుతుంది. ప్రయాణికుల సౌకర్యార్థం ఈ రైలు సికింద్రాబాద్, కామారెడ్డి, నిజామాబాద్, నాందేడ్, పూర్ణ, అకోలా, భోపాల్, ఉజ్జయిని, రత్లాం, అజ్మీర్ వంటి కీలకమైన రైల్వే స్టేషన్లలో ఆగుతుందని అధికారులు తెలిపారు.

ఈ రైలు సేవలు జూలై 24 నుంచి ప్రయాణికులకు అందుబాటులోకి రానున్నాయి. అన్ని వర్గాల ప్రజలకు అనువుగా ఉండేలా ఈ రైలులో ఎయిర్ కండిషన్డ్ (AC), స్లీపర్ క్లాస్, అలాగే ఎలాంటి రిజర్వేషన్ అవసరం లేని సాధారణ కోచ్‌లను కూడా ఏర్పాటు చేశారు. ఈ కొత్త రెగ్యులర్ రైలు వల్ల ఉత్తర భారతదేశానికి వెళ్లే తెలుగు రాష్ట్రాల ప్రజల రవాణా కష్టాలు చాలా వరకు తీరనున్నాయి.