Kidnap: హైదరాబాద్ టోలిచౌకి పరిధిలో దారుణం.. బాలిక కిడ్నాప్, విక్రయం..

హైదరాబాద్‌లోని టోలిచౌకి పోలీసు స్టేషన్ పరిధిలో దిగ్భ్రాంతికర సంఘటన వెలుగుచూసింది. ఓ మైనర్ బాలికను కిడ్నాప్ చేసి, నిర్బంధించి, చివరకు వ్యభిచార గృహానికి విక్రయించిన అమానుష ఘటన నగరంలో కలకలం రేపింది. సెప్టెంబర్ 2న ప్రధాన నిందితుడైన షేక్ అతీఫ్ అనే యువకుడు సదరు బాలికను ఆటోలో టోలిచౌకి నుంచి అత్తాపూర్ ప్రాంతానికి అపహరించుకుపోయాడు. అనంతరం ఆమెను లైంగికంగా వేధింపులకు గురిచేయడమే కాకుండా, అత్తాపూర్ లో వ్యభిచార గృహం నిర్వహిస్తున్న సబియా బేగం అనే మహిళకు కేవలం రూ. 30,000 కు విక్రయించాడు.

అక్కడితో ఆగకుండా.. నిందితులు నెల రోజులకు పైగా ఆ బాలికను బలవంతంగా వ్యభిచార కూపంలోకి నెట్టి క్రూరంగా లైంగిక దోపిడీకి పాల్పడ్డారు. ఎన్నో ఆంక్షలు, తీవ్ర నిర్బంధం మధ్య నరకం అనుభవించిన బాధితురాలు, అక్టోబర్ 5న ఎంతో ధైర్యంతో నిందితుల చెర నుంచి తప్పించుకోగలిగింది. నేరుగా తన తల్లిదండ్రుల వద్దకు చేరుకుని జరిగిన దారుణాన్ని వివరించడంతో, వారు వెంటనే పోలీసులను ఆశ్రయించి ఫిర్యాదు చేశారు.

కేసు నమోదు చేసుకుని రంగంలోకి దిగిన పోలీసులు ప్రత్యేక బృందాలతో దర్యాప్తు చేపట్టి, ప్రధాన నిందితులు షేక్ అతీఫ్, సబియా బేగంతో పాటు ఈ క్రూరత్వంలో భాగస్వాములైన మొత్తం ఎనిమిది మంది నిందితులను అదుపులోకి తీసుకున్నారు. మహిళలు, మైనర్ పిల్లల రక్షణపై ఆందోళన రేకెత్తించిన ఈ ఘోర ఘటనపై పోలీసులు కఠిన చట్టాల కింద కేసులు నమోదు చేసి సమగ్ర విచారణ జరుపుతున్నారు.