FIFA World Cup 2026: చరిత్ర సృష్టించిన కెనడా.. ‘జొనాథన్ డేవిడ్’ హ్యాట్రిక్ గోల్స్.! ఖతార్‌పై 6-0 భారీ విజయం.!

FIFA World Cup 2026: ఫిఫా ప్రపంచకప్ 2026లో కెనడా చరిత్రాత్మక విజయాన్ని నమోదు చేసింది. వాంకూవర్‌లో జరిగిన గ్రూప్-B మ్యాచ్‌లో ఖతార్‌ను 6-0 తేడాతో చిత్తుగా ఓడించి ప్రపంచకప్ చరిత్రలో తన తొలి విజయాన్ని అందుకుంది. ఈ భారీ విజయంతో కెనడా మూడు కీలక పాయింట్లు సాధించడమే కాకుండా నాకౌట్ దశకు చేరే అవకాశాలను మరింత బలపరుచుకుంది.

ఈ విజయానికి స్టార్ ఫార్వర్డ్ జొనాథన్ డేవిడ్ ప్రధాన కారణంగా నిలిచాడు. అద్భుతమైన హ్యాట్రిక్‌తో ఖతార్ ఆశలను పూర్తిగా దెబ్బతీశాడు. అతడితో పాటు సైల్ లారిన్, నాథన్ సలీబా కూడా గోల్స్ చేయగా.. ఖతార్ ఆటగాడు చేసిన సెల్ఫ్ గోల్ కూడా కెనడా ఖాతాలో చేరింది. మ్యాచ్ ప్రారంభం నుంచే కెనడా దూకుడుగా ఆడింది. 16వ నిమిషంలో సైల్ లారిన్ గోల్ చేసి జట్టుకు ఆధిక్యం అందించాడు. జొనాథన్ డేవిడ్ వాలీ షాట్‌ను ఖతార్ గోల్‌కీపర్ మహ్మూద్ అబునాడా అడ్డుకునే ప్రయత్నం చేసినా.. బంతి లారిన్ వద్దకు చేరడంతో అతడు సులభంగా గోల్ సాధించాడు.

29వ నిమిషంలో జొనాథన్ డేవిడ్ అద్భుతమైన రైట్ ఫుట్ వాలీతో మరో గోల్ నమోదు చేసి స్కోరును 2-0కి పెంచాడు. ఓపెన్ ప్లేలో ఏడాదికి పైగా విరామం తర్వాత అతడు నమోదు చేసిన గోల్. ఆ తర్వాత 33వ నిమిషంలో ఖతార్ పరిస్థితి మరింత క్లిష్టంగా మారింది. హోమన్ అహ్మద్‌కు రెడ్ కార్డు పడటంతో జట్టు పది మందితో ఆడాల్సి వచ్చింది. మొదట పెనాల్టీ ఇవ్వాలని నిర్ణయించిన రిఫరీ, వీడియో సమీక్ష అనంతరం ఫ్రీకిక్ ఇచ్చి, అహ్మద్‌కు ఇచ్చిన ఎల్లో కార్డును రెడ్ కార్డుగా మార్చాడు.

మొదటి అర్ధభాగం ఇంజరీ టైమ్‌లో జొనాథన్ డేవిడ్ మరో గోల్ చేసి కెనడా ఆధిక్యాన్ని 3-0కు చేర్చాడు. క్రాస్‌బార్‌ను తాకి తిరిగి వచ్చిన బంతిని గోల్‌గా మలిచి తన ప్రతిభను చాటుకున్నాడు. రెండో అర్ధభాగంలో మ్యాచ్‌లో అత్యంత ఆందోళనకర సంఘటన చోటుచేసుకుంది. కెనడా ఆటగాడు ఇస్మాయిల్ కోనే, ఖతార్ ఆటగాడు అసిమ్ మదీబోతో జరిగిన ఢీకొనడంతో ఎడమ కాలు దిగువ భాగంలో తీవ్ర గాయానికి గురయ్యాడు. దీనితో అతడిని స్ట్రెచర్‌పై మైదానం బయటకు తరలించారు. ఈ ఘటన అనంతరం మదీబోకు కూడా రెడ్ కార్డు చూపించడంతో ఖతార్ తొమ్మిది మంది ఆటగాళ్లకే పరిమితమైంది.

ఇస్మాయిల్ కోనే స్థానంలో వచ్చిన నాథన్ సలీబా 64వ నిమిషంలో ఫ్రీకిక్‌ను గోల్‌గా మలిచి స్కోరును 4-0కు చేర్చాడు. 75వ నిమిషంలో మొహమ్మద్ మనాయ్ చేసిన సెల్ఫ్ గోల్‌తో కెనడా ఆధిక్యం 5-0కు పెరిగింది. ఇంజరీ టైమ్‌ లో జొనాథన్ డేవిడ్ మరోసారి గోల్ చేసి తన హ్యాట్రిక్‌ను పూర్తి చేశాడు. దీంతో స్కోరు 6-0గా మారింది. ఈ ప్రపంచకప్‌లో ఒకే మ్యాచ్‌లో హ్యాట్రిక్ నమోదు చేసిన రెండో ఆటగాడిగా డేవిడ్ నిలిచాడు. అంతకుముందు అర్జెంటీనా కెప్టెన్ లియోనెల్ మెస్సి ఈ ఘనత సాధించాడు.

హ్యామ్‌స్ట్రింగ్ గాయం నుంచి కోలుకున్న కెనడా కెప్టెన్ అల్ఫోన్సో డేవిస్ జట్టుకు అందుబాటులో ఉన్నప్పటికీ ఈ మ్యాచ్‌లో బరిలోకి దిగలేదు. అలాగే మోయిస్ బొంబిటో కూడా ఎంపికకు సిద్ధంగా ఉన్నా ఆడే అవకాశం దక్కలేదు. మరోవైపు ఖతార్‌కు ఇది తీవ్ర నిరాశ కలిగించిన పరాజయం. తొలి మ్యాచ్‌లో స్విట్జర్లాండ్‌పై చివరి నిమిషంలో గోల్ చేసి 1-1తో డ్రా సాధించిన ఖతార్.. ఈసారి మాత్రం అన్ని విభాగాల్లో విఫలమై భారీ ఓటమిని చవిచూసింది. నాలుగేళ్ల క్రితం ఆతిథ్య దేశంగా ఉన్నప్పటికీ అన్ని గ్రూప్ మ్యాచ్‌ల్లో ఓడిన ఖతార్, ఇప్పటికీ ప్రపంచకప్‌లో తొలి విజయానికై ఎదురుచూస్తూనే ఉంది.

Canada secure their first-ever #FIFAWorldCup victory! 🇨🇦

— FIFA World Cup (@FIFAWorldCup) June 19, 2026