FIFA World Cup Final: ఏంటి.. ఒక్క టికెట్ ధర రూ.11 లక్షలా.? చరిత్రలోనే అత్యంత ఖరీదైన మ్యాచ్..!

FIFA World Cup: ఫుట్‌బాల్ అభిమానులు ఎంతో ఆసక్తిగా ఎదురుచూస్తున్న ఫిఫా వరల్డ్‌కప్ 2026 ఫైనల్ మ్యాచ్ టికెట్ ధరలు రికార్డులను బద్దలు కొట్టాయి. లియోనెల్ మెస్సీ నేతృత్వంలోని అర్జెంటీనా, యువ ఆటగాళ్లతో బలంగా ఉన్న స్పెయిన్ జట్టు మధ్య జరగనున్న ఈ తుది సమరానికి ప్రపంచవ్యాప్తంగా భారీ డిమాండ్ నెలకొంది. అమెరికాలోని న్యూజెర్సీ, ఈస్ట్ రదర్‌ఫోర్డ్‌లో ఉన్న మెట్‌లైఫ్ స్టేడియం వేదికగా జూలై 20న ఈ మ్యాచ్ జరగనుండగా.. భారత కాలమానం ప్రకారం రాత్రి 12:30 గంటలకు మొదలు కానుంది.

కొత్త చరిత్ర:

టికెట్ రీసేల్ ప్లాట్‌ఫామ్ TickPick వెల్లడించిన వివరాల ప్రకారం.. ఫుట్ బాల్ ఫైనల్ మ్యాచ్ కోసం అభిమానులు భారీగా ఖర్చు చేస్తున్నారు. ఒక్కో టికెట్‌కు సగటున 11,327 అమెరికన్ డాలర్లు (భారత కరెన్సీలో దాదాపు రూ.11 లక్షలు) చెల్లిస్తున్నారు. అమెరికా క్రీడా చరిత్రలో ఏ క్రీడా ఈవెంట్‌కైనా నమోదైన అత్యధిక సగటు టికెట్ ధర ఇదేనని TickPick తెలిపింది. నిజానికి అమెరికాలో అత్యంత ప్రజాదరణ పొందిన క్రీడా ఈవెంట్‌గా భావించే Super Bowl LVIII టికెట్ ధరల రికార్డును కూడా ఈ ఫిఫా ఫైనల్ అధిగమించింది. ఆ మ్యాచ్‌కు సగటు టికెట్ ధర 9,411 డాలర్లు (సుమారు రూ.9 లక్షలు) ఉండగా.. ఇప్పుడు ఫిఫా ఫైనల్ దానికంటే ఎక్కువ ధరతో సరికొత్త రికార్డు సృష్టించింది.

చౌక టికెట్ రూ.6.7 లక్షలు:

ఈ మ్యాచ్‌ను స్టేడియంలో ప్రత్యక్షంగా వీక్షించాలంటే భారీ మొత్తాన్ని ఖర్చు చేయాల్సిందే. TickPickలో అందుబాటులో ఉన్న అత్యంత తక్కువ ధర టికెట్ కూడా 6,943 డాలర్లు (సుమారు రూ.6.7 లక్షలు)గా నమోదైంది. అయినప్పటికీ టికెట్లకు డిమాండ్ ఏమాత్రం తగ్గడం లేదని సమాచారం. ఈ ఫైనల్ మ్యాచ్‌లో ఒకవైపు స్పెయిన్ ప్రపంచకప్‌ను కైవసం చేసుకోవాలని లక్ష్యంగా పెట్టుకోగా.. మరోవైపు లియోనెల్ మెస్సీ వరుసగా రెండో ప్రపంచకప్ టైటిల్‌ను గెలిచి తన అద్భుత కెరీర్‌ను మరింత చిరస్మరణీయంగా మార్చాలని భావిస్తున్నాడు. దీంతో ప్రపంచవ్యాప్తంగా ఫుట్‌బాల్ అభిమానుల దృష్టి మొత్తం ఈ మెగా ఫైనల్‌ పైనే నిలిచింది.