Semi Final: సెమీఫైనల్‌కు తిలక్ వర్మ, రజత్ పాటిదార్.. అందరి కళ్లు వైభవ్ బ్యాటింగ్‌పైనే..

భారత దేశవాళీ క్రికెట్ సీజన్ ఆగస్టు 23 నుంచి ప్రారంభం కానుంది. ఈ సీజన్‌కు దలీప్ ట్రోఫీ రెడ్ బాల్ టోర్నమెంట్‌తో అరంగేట్రం లభిస్తోంది. ఆగస్టు 23 నుండి సెప్టెంబర్ 10 వరకు సాగే ఈ టోర్నీలో మొత్తం 6 జోనల్ జట్లు పోటీపడుతున్నాయి. డిఫెండింగ్ ఛాంపియన్ రజత్ పటిదార్ నేతృత్వంలోని సెంట్రల్ జోన్, రన్నరప్ తిలక్ వర్మ సారథ్యంలోని సౌత్ జోన్ జట్లు నేరుగా సెమీఫైనల్స్‌కు అర్హత సాధించాయి. మిగిలిన ఈస్ట్ జోన్, నార్త్ ఈస్ట్ జోన్, నార్త్ జోన్, వెస్ట్ జోన్ జట్లు క్వార్టర్ ఫైనల్స్‌లో తలపడతాయి. నాకౌట్ ఫార్మాట్‌లో సాగే ఈ టోర్నీలో ఓడిపోయిన జట్టు నేరుగా నిష్క్రమిస్తుంది.

ఈ టోర్నీలో అందరి దృష్టి 15 ఏళ్ల సంచలనం వైభవ్ సూర్యవంశీపైనే ఉంది. ఈస్ట్ జోన్ జట్టుకు వైభవ్ వైస్ కెప్టెన్‌గా ఎంపికై అందరినీ ఆశ్చర్యపరిచాడు. ఈస్ట్ జోన్ జట్టుకు ఇషాన్ కిషన్ కెప్టెన్‌గా వ్యవహరిస్తుండగా, వైభవ్ మ్యాచ్ నిర్ణయాల్లో కీలక పాత్ర పోషించనున్నాడు. బెంగళూరులోని బీసీసీఐ సెంటర్ ఆఫ్ ఎక్సలెన్స్‌లో ఆగస్టు 23 నుండి 26 వరకు జరిగే మొదటి క్వార్టర్ ఫైనల్‌లో ఈస్ట్ జోన్ జట్టు నార్త్ ఈస్ట్ జోన్‌తో తలపడనుంది. ఈ మ్యాచ్ ద్వారా వైభవ్ మైదానంలోకి దిగి తన బ్యాటింగ్ ప్రతిభను ప్రదర్శించనున్నాడు.

ఒకవేళ ఈస్ట్ జోన్ ఈ క్వార్టర్ ఫైనల్‌లో విజయం సాధిస్తే, ఆగస్టు 30 నుండి సెప్టెంబర్ 2 వరకు జరిగే మొదటి సెమీఫైనల్‌లో బలమైన సెంట్రల్ జోన్‌తో పోటీపడుతుంది. రెండవ క్వార్టర్ ఫైనల్‌లో నార్త్ జోన్ మరియు వెస్ట్ జోన్ తలపడగా, ఆ విజేత సెమీఫైనల్‌లో సౌత్ జోన్‌ను ఎదుర్కొంటుంది. టోర్నీ విజేతను నిర్ణయించే గ్రాండ్ ఫైనల్ మ్యాచ్ సెప్టెంబర్ 6 నుండి 10 వరకు జరగనుంది. ఈ దలీప్ ట్రోఫీ 2026-27కి సంబంధించిన అన్ని మ్యాచ్‌లు భారత కాలమానం ప్రకారం ఉదయం 9:30 గంటలకు ప్రారంభమవుతాయి. ఈస్ట్ జోన్ సాధించే విజయాలు మరియు వైభవ్ సూర్యవంశీ, ఇషాన్ కిషన్ జోడీ ప్రదర్శనపై అభిమానుల్లో భారీ అంచనాలు నెలకొన్నాయి.