DK Shivakumar: ఎట్టకేలకు కర్ణాటకకు కొత్త ముఖ్యమంత్రిగా డీకే శివకుమార్ ప్రమణస్వీకారం చేయడానికి సిద్ధమవుతున్నారు. సీఎంగా ఉన్న సిద్ధరామయ్య రాజీనామా చేయబోతున్నారు. అయితే, ఇప్పుడు డీకే శివకుమార్ ఆస్తుల గురించి చర్చ నడుస్తోంది. కాంగ్రెస్ పార్టీకి బిగ్ ఫండర్గా ఉన్న వ్యక్తుల్లో్ డీకే ఒకరు. దేశంలోనే అత్యంత ధనవంతులైన రాజకీయ నాయకుల్లో ఆయన ఒకరు.
2023 అసెంబ్లీ ఎన్నికల సమయంలో ఎన్నికల సంఘానికి సమర్పించిన అఫిడవిట్లో డీకే శివకుమార్ తన ఆస్తుల వివరాలను వెల్లడించారు . ఆయన తన నికర ఆస్తి విలువ రూ. 1,400 కోట్లకు పైగా ఉందని పేర్కొన్నారు. ఆయనకు షాపింగ్ మాల్స్, ఇతర ఖరీదైన వాణిజ్య ఆస్తులు ఉన్నాయి. అంతేకాకుండా, ఆయన స్టాక్ మార్కెట్లో కోట్లాది రూపాయలు పెట్టుబడి పెట్టారు.
Myneta.comలో అప్లోడ్ చేసిన ఎన్నికల అఫిడవిట్ ప్రకారం.. ఆయన తన కుటుంబం ఆస్తులు రూ. 1413 కోట్లు ఉన్నట్లు ప్రకటించారు. అప్పులు రూ. 503 కోట్లు ఉన్నట్లు చెప్పారు. డీకేతో పాటు ఆయన కుటుంబీకులకు వివిధ బ్యాంకుల్లో రూ. 16 కోట్లకు పైగా డిపాజిట్లు ఉన్నట్లు వెల్లడించారు. తన చరాస్తులు రూ. 244 కోట్లకు పైగా, తన కుటుంబ ఆస్తులు రూ. 273 కోట్లకు పైగా ఉన్నట్లు తెలిపారు. డీకే స్థిరాస్తులు రూ. 970 కోట్లుగా చెప్పారు.
ఇదే కాకుండా షేర్లు, స్టాక్ మార్కెట్లో కోట్ల పెట్టుబడులు ఉన్నట్లు తెలిపారు. అనేక కంపెనీల్లో రూ. 4.20 కోట్ల పెట్టుబడులు, రూ. 9 కోట్ల విలువైన ఎఫ్డీలు, బంగారం, వెండి, వజ్రాల వంటి విలువైన వస్తులు ఉన్నాయి. లక్షల విలువైన రోలెక్స్ , హుబ్లోట్ వాచీలు ఉన్నాయి. డీకే శివకుమార్, ఆయన భార్య, పిల్లలకు ఉన్న ఆభరణాల మొత్తం విలువ 3.82 కోట్లకు పైగా ఉంటుందని అంచనా.
డీకే భార్యకు రూ. 30 కోట్ల వ్యవసాయ భూమి, దీనితో పాటు ఢిల్లీ, బెంగళూర్లో పలు ప్రాంతాల్లో రూ. 84 కోట్ల పైగా విలువైన ఇళ్లు, ఫ్లాట్లు ఉన్నాయి. ఆయనకు రూ. 900 కోట్ల విలువైన గ్లోబల్ మాల్ ఉంది. కోట్ల విలువైన దుకాణాలు, ఇతర ఆస్తులు ఉన్నాయి.