Dating App Cyber Fraud: మల్కాజిగిరి కమిషనరేట్ పరిధిలో డేటింగ్ యాప్ ద్వారా సాఫ్ట్వేర్ ఇంజనీర్ను టార్గెట్ చేసి సైబర్ మోసానికి పాల్పడిన ఘటన వెలుగులోకి వచ్చింది. యువతి వలలో చిక్కుకున్న బాధితుడు చివరకు పోలీసులను ఆశ్రయించాడు. పోలీసుల తెలిపిన సమాచారం ప్రకారం.. డేటింగ్ యాప్లో శిక్ష అనే పేరుతో ఓ యువతి సాఫ్ట్వేర్ ఇంజనీర్కు పరిచయమైంది. కొద్ది రోజుల చాటింగ్ అనంతరం వాట్సాప్లో వీడియో కాల్ చేసి అసభ్యకరంగా ప్రవర్తించింది. న్యూడ్ వీడియో కాల్ చేసింది. తాను సైతం న్యూడ్ వీడియో కాల్ చేయాలని బాధితుడిపై ఒత్తిడి తెచ్చింది.
ఆ వీడియో కాల్ అనంతరం బాధితుడికి టెలిగ్రామ్ ద్వారా ఒక లింక్ పంపింది. ఆ లింక్ను ఓపెన్ చేసిన వెంటనే బాధితుడి మొబైల్లోని కాంటాక్ట్ లిస్ట్ మొత్తం సేకరించింది ఆ కిలేడీ.. తర్వాత డబ్బులు ఇవ్వకపోతే వీడియోలను కాంటాక్ట్లలో ఉన్న వారందరికీ పంపిస్తానని బెదిరింపులకు దిగింది. ఈ విధంగా బాధితుడి నుంచి సుమారు రూ.2.5 లక్షలు వసూలు చేసింది. అయినా మరింత డబ్బు డిమాండ్ చేయడంతో బాధితుడు చెల్లించడానికి నిరాకరించాడు. దీంతో కాంటాక్ట్ లిస్ట్లోని కొందరికి వీడియోలను పంపింది. దీంతో బాధితుడు మల్కాజిగిరి సైబర్ క్రైమ్ పోలీసులును ఆశ్రయించి ఫిర్యాదు చేశాడు. కేసు నమోదు చేసిన పోలీసులు నిందితురాలు, ఆమె వెనుక ఉన్న ముఠాను గుర్తించే పనిలో పడ్డారు.