Dancers Association Dispute: డాన్సర్స్ అసోసియేషన్లో నెలకొన్న వివాదాలపై డాన్సర్స్ అసోసియేషన్ ప్రెసిడెంట్ రఘు మాస్టర్ ఆధ్వర్యంలో ఫిల్మ్ ఛాంబర్లో మీడియా సమావేశం నిర్వహించారు. ఈ సందర్భంగా సత్య మాస్టర్, రాజన్న మాస్టర్ తదితరులు అసోసియేషన్లోని సమస్యలపై మాట్లాడారు.
ఒక యూనియన్కు సంబంధించిన అంతర్గత సమస్యలు బహిరంగంగా చర్చకు రావడం బాధాకరమని సత్య మాస్టర్ అన్నారు. అసోసియేషన్లో సుమారు 600 మంది డాన్సర్లు ఉన్నారని, అయితే కొంతమంది కారణంగా మొత్తం అసోసియేషన్కు ఇబ్బందులు వస్తున్నాయని ఆరోపించారు. డాన్సర్స్ అసోసియేషన్లో అనేక సమస్యలు ఉన్నాయని, అసోసియేషన్ను బలహీనపరిచే ప్రయత్నాలు జరుగుతున్నందుకే తాము మీడియా ముందుకు వచ్చామని అన్నారు.
అసోసియేషన్ అధ్యక్షురాలు సుమలత సరైన నిర్ణయాలు తీసుకోవాలని సత్య మాస్టర్ కోరారు. ఆమె ఎన్నికల సమయంలో ఇచ్చిన హామీలను అమలు చేయాలని అన్నారు. అసోసియేషన్లో కొంతమంది సభ్యులు మాట్లాడేందుకు భయపడుతున్నారని, అందుకే సీనియర్లుగా తాము వారి తరఫున మాట్లాడుతున్నామని పేర్కొన్నారు. ఇటీవల జరిగిన జనరల్ బాడీ సమావేశంలో మాట్లాడుతున్న సభ్యుల నుంచి మైక్ తీసుకునే పరిస్థితి ఏర్పడిందని సత్య మాస్టర్ ఆరోపించారు. అధ్యక్షురాలి హోదాలో పరిస్థితిని నియంత్రించాల్సిన బాధ్యత ఉన్నప్పటికీ, అందుకు బదులుగా కొందరిని సమర్థించడం సరికాదన్నారు. సమావేశంలో మినిట్స్ బుక్ తీసుకునే ప్రయత్నం కూడా జరిగిందని పేర్కొన్నారు.
ఫెడరేషన్ తమకు తల్లిలాంటిదని సత్య మాస్టర్ అన్నారు. ఫెడరేషన్ విషయంలో పరిస్థితిని బట్టి భిన్నంగా వ్యవహరించడం వల్లే సమస్యలు వస్తున్నాయని ఆరోపించారు. యూనియన్కు సమస్య వచ్చినప్పుడు సీనియర్లుగా తాము తప్పకుండా స్పందిస్తామని స్పష్టం చేశారు. మరోవైపు అక్టోబర్ 11న ఎన్నికలు నిర్వహించేందుకు సభ్యుల నిర్ణయం మేరకు ముందుకు వెళ్తున్నామని సత్య మాస్టర్ తెలిపారు. డాన్సర్లకు న్యాయం జరగాలంటే ఎన్నికలు నిర్వహించాల్సిన అవసరం ఉందన్నారు.
సుమలత తమపై ఆధారాలు లేని ఆరోపణలు చేస్తున్నారని రాజన్న మాస్టర్ అన్నారు. ఇటీవల జరిగిన జనరల్ బాడీ సమావేశంలో మెజారిటీ డాన్సర్లు అక్టోబర్ 11న ఎన్నికలు నిర్వహించేందుకు మద్దతు తెలిపారని పేర్కొన్నారు. ఫెడరేషన్ అధ్యక్షుడు అనిల్పై సుమలత చేసిన ఆరోపణలను కూడా రాజన్న మాస్టర్ ఖండించారు. తమపై, ఫెడరేషన్ అధ్యక్షుడిపై చేస్తున్న ఆరోపణల్లో వాస్తవం లేదని తెలిపారు. అసోసియేషన్లో నెలకొన్న సమస్యలకు పరిష్కారం కోసం ఎన్నికలు నిర్వహించాల్సిన అవసరం ఉందని పేర్కొన్నారు.
