నా ప్రయాణం ముగియనుంది.! తన రిటైర్మెంట్ను ప్రకటించిన Cristiano Ronaldo.. శోకసంద్రంలో అభిమానులు.!

Cristiano Ronaldo: ఫుట్‌బాల్ ప్రపంచ దిగ్గజ ఆటగాళ్లలో ఒకరైన క్రిస్టియానో రొనాల్డో (Cristiano Ronaldo) తన కెరీర్‌కు సంబంధించి అధికారిక ప్రకటన చేశాడు. 2026 ఫిఫా వరల్డ్‌కప్ తన కెరీర్‌లో చివరి ప్రపంచకప్ అని స్పష్టం చేసిన ఆయన, ఈ టోర్నీలోని ప్రతి క్షణాన్ని ఆస్వాదించాలనుకుంటున్నట్లు అన్నారు. స్పెయిన్‌తో జరగనున్న రౌండ్ ఆఫ్ 16 మ్యాచ్‌కు ముందు మీడియాతో మాట్లాడిన ఈ పోర్చుగల్ కెప్టెన్.. తన వరల్డ్‌కప్ భవిష్యత్తుపై నెలకొన్న ఊహాగానాలకు తెరదించాడు.

ఈ మీడియా సమావేశంలో మాట్లాడుతూ.. “ఇదే నా చివరి వరల్డ్‌కప్. అయితే రేపటి మ్యాచ్ నా చివరి మ్యాచ్ కాకూడదని ఆశిస్తున్నాను” అని రొనాల్డో వ్యాఖ్యానించాడు. పోర్చుగల్ జట్టు టోర్నీలో మరింత ముందుకు సాగాలని కోరుకుంటున్నానని, ప్రస్తుతం తన దృష్టి మొత్తం జట్టు విజయంపైనే ఉందని చెప్పుకొచ్చాడు. అలాగే మీడియా, విమర్శకుల నుంచి వస్తున్న వ్యాఖ్యలపై కూడా రొనాల్డో స్పందించాడు. పోర్చుగల్ తదుపరి దశకు చేరితే తనపై విమర్శలు కొనసాగించడానికి మరో అవకాశం లభిస్తుందని సరదాగా వ్యాఖ్యానించాడు.

“అలా అయితే మీరు నన్ను ఇంకొంచెం విమర్శించవచ్చు. నన్ను ఎప్పుడూ విమర్శించాలనే ప్రయత్నం చేస్తుంటారు” అని చిరునవ్వుతో అన్నాడు. మరో సందర్భంలో విలేకరులు తన చివరి వరల్డ్‌కప్ మ్యాచ్ కావొచ్చని ప్రశ్నించగా.. “మీరు నన్ను ఇక చూడకూడదనుకుంటున్నారా?” అంటూ చమత్కరించాడు. అయితే తన కెరీర్‌పై ఎలాంటి పశ్చాత్తాపం లేదని స్పష్టం చేశాడు. “రేపు ఏం జరిగినా నేను పూర్తి సంతృప్తితో వెళ్తాను. 100% కాదు.. 1000%.. ఫుట్‌బాల్‌కు నేను ఇవ్వగలిగినదంతా ఇచ్చాను” అని రొనాల్డో అన్నారు.

డబ్బు కోసం కాదు.. ఫుట్‌బాల్‌పై ప్రేమతోనే:

తాను ఎప్పుడూ డబ్బు కోసం ఫుట్‌బాల్ ఆడలేదని రొనాల్డో పేర్కొన్నాడు. దేవుడి దయతో నా జీవితం చాలా బాగుంది. నేను ఫుట్‌బాల్ ఆడటానికి కారణం డబ్బు కాదు. ఈ ఆటపై ఉన్న ప్రేమే.. నన్ను ఇన్ని సంవత్సరాలు ముందుకు నడిపించింది అని చెప్పుకొచ్చారు. ఈ టోర్నీలో తన ప్రదర్శనపై వస్తున్న విమర్శలను కూడా ఆయన తిప్పికొట్టాడు. ఇప్పటివరకు మూడు గోల్స్ సాధించానని, కొందరు మరింత బాగా ఆడుతున్నప్పటికీ తాను చెడు ప్రదర్శన చేయలేదని స్పష్టం చేశాడు.

స్పెయిన్‌తో కీలక పోరు:

ఇక రౌండ్ ఆఫ్ 16లో పోర్చుగల్‌కు స్పెయిన్ రూపంలో గట్టి సవాల్ ఎదురుకానుంది. ఈ మ్యాచ్ విజేత క్వార్టర్ ఫైనల్‌కు చేరుకోనుంది. స్పెయిన్ బలమైన జట్టేనని అంగీకరించిన రొనాల్డో.. నాకౌట్ మ్యాచ్‌లలో చిన్న చిన్న అంశాలే ఫలితాన్ని నిర్ణయిస్తాయని అభిప్రాయపడ్డాడు. స్పెయిన్ ఎప్పుడూ టైటిల్ ఫేవరెట్ జట్టే. వారికి మాకంటే ఎక్కువ విజయాలు ఉన్నాయి. కానీ ఇది వేరే టోర్నీ, వేరే ఆటగాళ్లు. గెలుపు చిన్న చిన్న విషయాలపైనే ఆధారపడి ఉంటుంది అని రోనాల్డో అన్నాడు. స్పెయిన్‌పై తన రికార్డు కూడా బాగానే ఉందని.. ఈ మ్యాచ్‌లో మేమే గెలుస్తామనే భావన ఆయ్నదని ధీమా వ్యక్తం చేశాడు. స్పెయిన్‌పై పోర్చుగల్ విజయం సాధిస్తే రొనాల్డో చివరి వరల్డ్‌కప్ ప్రయాణం మరికొంత కాలం కొనసాగుతుంది. ఒకవేళ ఓడిపోతే మాత్రం ఫుట్‌బాల్ చరిత్రలో అత్యంత గొప్ప కెరీర్‌లలో ఒకటైన రొనాల్డో అధ్యాయం ముగియనుంది.

"Vai ser o meu último mundial" 🗣️ Cristiano Ronaldo 😢#DAZNFIFAWC pic.twitter.com/aESFoNG9Tr

— DAZN Portugal (@DAZNPortugal) July 5, 2026