ఆర్టిఫిషియల్ ఇంటెలిజెన్స్ (AI) రాకతో మానవ జీవితంలో పనులు సులభతరమైనప్పటికీ, దీనికి సంబంధించిన భద్రతాపరమైన ఆందోళనలు కూడా క్రమంగా పెరుగుతున్నాయి. ఈ నేపథ్యంలో మైక్రోసాఫ్ట్ సహ వ్యవస్థాపకుడు బిల్ గేట్స్ AI వినియోగంపై తీవ్ర ఆందోళన వ్యక్తం చేశారు. అత్యంత శక్తివంతమైన AI మోడళ్ల తయారీని నియంత్రించేందుకు అమెరికా చట్టసభ సభ్యులు కఠినమైన చట్టాలు తీసుకురావాలని ఆయన కోరారు. మీడియా సమావేశంలో ఆయన మాట్లాడుతూ.. కేవలం పెద్ద టెక్ కంపెనీలు తమంతట తాముగా తీసుకునే భద్రతా చర్యలు AI ప్రమాదాలను అరికట్టడానికి సరిపోవవని ఆయన స్పష్టం చేశారు.
AI అభివృద్ధిని నియంత్రించడానికి అమెరికా ప్రభుత్వం చట్టాలు చేయాలా వద్దా అని అడిగిన ప్రశ్నకు బిల్ గేట్స్ స్పందిస్తూ ‘ఖచ్చితంగా అవసరమే’ అని బదులిచ్చారు. AI కంపెనీలు ఎలాంటి భద్రతా ప్రమాణాలు పాటించాలనే దానిపై రాజకీయ నాయకులు, చట్టాన్ని అమలు చేసే ఏజెన్సీలు చర్చల్లో భాగం కావాలని ఆయన సూచించారు. ఈ నిబంధనలు స్వచ్ఛందంగా కాకుండా తప్పనిసరిగా ఉండాలని అన్నారు. దీనివల్ల టెక్ పరిశ్రమపై కొంత అదనపు భారం పడినప్పటికీ, వారి పనులకు ఎలాంటి పెద్ద ఆటంకం కలగదని ఆయన అభిప్రాయపడ్డారు. కేవలం టెక్ కంపెనీలు తమ స్వంత నిబంధనలపై మాత్రమే ఆధారపడలేవన్నారు.
ప్రస్తుతం టెక్ పరిశ్రమలో మరింత వేగంగా, శక్తివంతమైన AI సిస్టమ్ల అభివృద్ధిపై చర్చ జరుగుతోంది. ఈ నెల ప్రారంభంలో ఓపెన్ఏఐ, ఆంత్రోపిక్ వంటి ప్రముఖ AI కంపెనీల ఉన్నతాధికారులు సైతం AI అభివృద్ధి వేగంపై తమ ఆందోళనలను వ్యక్తం చేశారు. ఫ్రాంటియర్ AI సిస్టమ్స్ అభివృద్ధిని కొంత మందగించేలా చర్యలు తీసుకోవాలని, ప్రభుత్వాలు, AI కంపెనీల మధ్య మరింత సహకారం ఉండాలని ఆంత్రోపిక్ సీఈఓ డారియో అమోడై కోరారు. అలాగే AI సామర్థ్యాలు, ప్రమాదాలు, భద్రతా చర్యలను కవర్ చేసే అంతర్జాతీయ ప్రమాణాలు కావాలని ఓపెన్ఏఐ సీఈఓ సామ్ ఆల్ట్మ్యాన్ డిమాండ్ చేశారు. సామర్థ్యాలను కొలవడం, ప్రమాదాలను అంచనా వేయడం, భద్రతా చర్యలు సరిపోతాయో లేదో నిర్ధారించడం, AIపై మానవ పర్యవేక్షణను కొనసాగించడం ఈ ప్రమాదాల ముఖ్య ఉద్దేశం కావాలని ఆయన తెలిపారు.
భవిష్యత్తులో అత్యంత అధునాతన సిస్టమ్లను మానవులు నియంత్రించలేని పరిస్థితి ఏర్పడుతుందనే ఆందోళనలతో పాటు, ప్రస్తుత AI సాంకేతికతను దుర్వినియోగం చేసే ప్రమాదం కూడా ఉందని బిల్ గేట్స్ హెచ్చరించారు. “AI అనేది బిలియన్ల మంది ప్రజల మరణాలకు కారణమయ్యేలా విపత్తులను సృష్టించగలదు” అని ఆయన సంచలన వ్యాఖ్యలు చేశారు. చెడు ఉద్దేశాలు ఉన్నవారు సరికొత్త AI టూల్స్ను ఉపయోగించడం ద్వారా గతంలో ఎన్నడూ చూడని రీతిలో అత్యంత శక్తివంతమైన ప్రమాదకర పరిస్థితులు తలెత్తే అవకాశం ఉందని ఆయన ఆందోళన వ్యక్తం చేశారు. ఇంకా అత్యంత అధునాతన స్థాయికి చేరుకోకముందే AI వల్ల పెద్దఎత్తున నష్టం జరిగే ముప్పు పొంచివుందన్న వాస్తవాన్ని బిల్ గేట్స్ మాటలు బలంగా గుర్తుచేస్తున్నాయి.