Vijay Antony Daughter: బిచ్చగాడు హీరో విజయ్ ఆంటోని కూతురు ఆత్మహత్య!

Tamil Hero Vijay Antony Daughter Meera Committed Suicide: తమిళ హీరో విజయ్‌ ఆంటోని కూతురు ఆత్మహత్య చేసుకున్నారు. విజయ్ కూతురు మీరా మంగళవారం తెల్లవారుజామున ఇంట్లో ఉరేసుకొని ఆత్మహత్య చేసుకున్నారు. ఆత్మహత్యకు పాల్పడిందని తెలిసి కుటుంబసభ్యులు ఆసుపత్రికి తరలిస్తుండగా.. మీరా మృతి చెందినట్లు సమాచారం. విజయ్‌ ఆంటోని కూతురు మీరా వయసు 17 ఏళ్లు కాగా.. ఆమె 12వ తరగతి చదువుతున్నారు.

విజయ్‌ ఆంటోని కూతురు మీరా చెన్నైలోని చర్చ్ పార్క్ స్కూల్‌లో 12వ తరగతి చదువుతున్నారు. నివేదికల ప్రకారం.. మీరా తీవ్ర మానసిక ఒత్తిడిలో ఉన్నారట. మానసిక ఒత్తిడిలో ఉరేసుకొని ఆత్మహత్యకు పాల్పడ్డారట. దీంతో విజయ్‌ ఆంటోని కుటుంబం తీవ్ర విషాదంలో మునిగిపోయింది. విషయం తెలిసిన పలువురు నటులు, ఫాన్స్.. విజయ్ కుటుంబ సభ్యులకు సానుభూతి తెలుపుతున్నారు. మీరా ఆత్మహత్యకు గల అసలు కారణాలు తెలియాల్సి ఉంది.

విజయ్‌ ఆంటోని కథానాయకుడిగా నటించిన తాజా సినిమా ‘రత్తం’. సీఎస్‌ అముదమ్‌ దర్శకత్వంలో ఇన్ఫినిటీ ఫిలిమ్‌ వెంచర్స్‌ పతాకంపై కమల్‌ బోరా, జి.ధనుంజయన్‌, ప్రదీప్‌ బి.పంకజ్‌ బోరా నిర్మిస్తున్నారు. ఈ సినిమాలో రమ్య నంబీశన్‌, మహిమ నబియార్‌, నందిత శ్వేత హీరోయిన్‌గా నటిస్తున్నారు. ఈ చిత్రానికి కన్నన్‌ నారాయణన్‌, గోపీ అమర్నాథ్‌ సంగీతాన్ని అందిస్తున్నారు. నిర్మాణ కార్యక్రమాలను పూర్తి చేసుకున్న రత్తం సినిమా అక్టోబర్‌ 6న విడుదలకు సిద్ధమవుతోంది.

విజయ ఆంటోని మ్యూజిక్ డైరెక్టర్‌గా చాలా సినిమాలు చేశారు. సింగర్ గాను ఆయన ప్రతిభ చాటారు. ‘బిచ్చగాడు’ సినిమాతో తెలుగు ప్రేక్షకులకు విజయ్ ఆంటోని దగ్గరయ్యారు. అంతకుముందు ఆయన పలు సినిమాలతో తెలుగు ప్రేక్షకులను అలరించారు. ఇటీవల ‘బిచ్చగాడు 2’ సినిమాతో ప్రేక్షకుల ముందుకు వచ్చారు.