ఐదు మ్యాచ్‌ల టీ20 సిరీస్‌లో భారత్ చేతిలో 3-0తో వెనుకంజలో ఉన్న న్యూజిలాండ్ జట్టు, ఆఖరి రెండు మ్యాచ్‌లలో తమ చిన్న చిన్న లోపాలను సరిదిద్దుకోవడంపై పూర్తి దృష్టి సారించనున్నట్లు ఆ జట్టు బ్యాటర్ బెవోన్ జాకబ్స్ వెల్లడించారు. ఆక్లాండ్‌లో భారత్‌తో జరగనున్న నాలుగో టీ20 మ్యాచ్‌కు ముందు ఆయన మీడియాతో మాట్లాడుతూ ఈ విషయాలు పంచుకున్నారు.
ప్రస్తుతం 0-3తో సిరీస్ కోల్పోవడం ఏమాత్రం బాగోలేదని, అయినప్పటికీ తమ జట్టు సానుకూల దృక్పథంతోనే ముందుకు వెళ్తోందని జాకబ్స్ స్పష్టం చేశారు. తొలి రెండు మ్యాచ్‌లు ఎంతో హోరాహోరీగా సాగాయని, అదే జోరును ఆఖరి రెండు మ్యాచ్‌లలోనూ కొనసాగిస్తామని ధీమా వ్యక్తం చేశారు. తాము ఏ స్థితిలో ఉన్నామో తమకు బాగా తెలుసని, అలాగని ప్రయత్నాలు మాత్రం ఆపబోమని, గత మూడు మ్యాచ్‌ల ప్రదర్శనను బేరీజు వేసుకుని ఆఖరి రెండు మ్యాచ్‌లలో వంద శాతం కష్టపడతామని తెలిపారు.
ఈ సిరీస్‌కు ముందు టీ20 ప్రపంచ కప్ 2026 ఫైనల్‌లోనూ భారత్ చేతిలోనే కివీస్ జట్టు ఓటమిపాలైంది. ప్రస్తుత సిరీస్‌లోని తొలి మూడు మ్యాచ్‌లలోనూ తమ జట్టు విజయానికి అతి సమీపంలోకి వెళ్లిందని, కానీ చిన్న చిన్న పొరపాట్ల వల్ల గెలుపు గీతను దాటలేకపోయామని జాకబ్స్ అభిప్రాయపడ్డారు. ముఖ్యంగా ప్రత్యర్థి జట్టులో ఒక ఆటగాడు ఆడిన అద్భుతమైన శతక ఇన్నింగ్స్‌ను (అభిషేక్ శర్మ) ఆయన ఈ సందర్భంగా ప్రశంసించారు. అతడి ఆటతీరు మాకు కలలో కూడా కనిపిస్తుందని.. అద్భుతమైన ఇన్నింగ్స్ ఆడాడని కొనియాడాడు.
ఓటమికి టాస్‌ను తాము ఎప్పుడూ కారణంగా చూపబోమని జాకబ్స్ స్పష్టం చేశారు. టాస్ గెలవడం, ఓడడమనేది ఆటలో సహజమని, కానీ మైదానంలో చేసే ప్రదర్శనే అంతిమ ఫలితాన్ని నిర్ణయిస్తుందని ఆయన అభిప్రాయపడ్డారు. ఇక ఐపీఎల్‌లో ముంబై ఇండియన్స్ జట్టు తరఫున ఆడిన అనుభవం తనకు ఎంతో ఉపయోగపడిందని, విభిన్న పరిస్థితులలో ఎలా ఆడాలో నేర్చుకోవడానికి ఆ అనుభవం ఎంతగానో దోహదపడిందని ఆయన సంతోషం వ్యక్తం చేశారు.