బంగాళాఖాతంలో వాతావరణ పరిస్థితులు వేగంగా మారుతున్నాయి. ఈ నెల 13వ తేదీ నాటికి ఆగ్నేయ బంగాళాఖాతంలో ఒక అల్పపీడనం ఏర్పడటానికి అనుకూల పరిస్థితులు నెలకొన్నాయని వాతావరణ శాఖ అధికారులు వెల్లడించారు. సముద్ర ఉపరితలంపై ఏర్పడే గాలుల దిశ, ఉష్ణోగ్రతల ఆధారంగా ఈ వ్యవస్థ మరింత బలపడే అవకాశం ఉందని భావిస్తున్నారు. ప్రస్తుతం ఉన్న సమాచారం ప్రకారం.. ఈ అల్పపీడనం తుఫానుగా మారే అవకాశం కూడా ఉందనే సంకేతాలు వ్యక్తమవుతున్నాయి. అయితే, ఇది తీవ్రమైన తుఫానుగా మారుతుందా లేదా సాధారణ అల్పపీడనంగానే మిగిలిపోతుందా అనే విషయంపై మరికొన్ని గంటల్లో స్పష్టత రానుంది.
ఈ అల్పపీడన ప్రభావం ప్రధానంగా తెలుగు రాష్ట్రాలైన ఆంధ్రప్రదేశ్, తెలంగాణలపై ఏ విధంగా ఉంటుందనే దానిపై ప్రజల్లోనూ, రైతుల్లోనూ ఆందోళన వ్యక్తమవుతోంది. ప్రసుతం వీస్తున్న గాలుల దిశ ఒడిశా, పశ్చిమ బెంగాల్ వైపునకు ఉన్నట్లు వాతావరణ నిపుణులు గమనించారు. రాబోయే 24 గంటల కాలం ఈ అల్పపీడన గమనాన్ని అంచనా వేయడంలో చాలా కీలకమైనది. గాలుల వేగం, తేమ శాతం మరియు సముద్ర మట్టంలో మార్పులను నిరంతరం పర్యవేక్షిస్తున్నారు. ఒకవేళ ఈ వ్యవస్థ గమనం మారి కోస్తా ఆంధ్ర వైపునకు తిరిగితే, తీరప్రాంత జిల్లాల్లో భారీ నుండి అత్యంత భారీ వర్షాలు కురిసే ప్రమాదం ఉంది.
ముఖ్యంగా ఏపీ తీరప్రాంత ప్రజలు, మత్స్యకారులు ముందస్తు హెచ్చరికలపై దృష్టి సారించాలని అధికారులు సూచిస్తున్నారు. వేటకు వెళ్లే మత్స్యకారులు సముద్రంలోకి వెళ్లవద్దని, ఇప్పటికే వేటలో ఉన్నవారు సురక్షిత ప్రాంతాలకు చేరుకోవాలని ఆదేశాలు జారీ చేశారు. వర్షాల వల్ల పంట నష్టం జరగకుండా రైతులు తగిన జాగ్రత్తలు తీసుకోవాలని వ్యవసాయ శాఖ అధికారులు కోరారు. రాబోయే 24 గంటల్లో గాలి మళ్లింపు ఆధారంగా ఈ అల్పపీడన దిశ, తీవ్రతపై పూర్తిస్థాయి స్పష్టత వస్తుంది. పరిస్థితికి తగినట్లుగా స్థానిక యంత్రాంగాలు సిద్ధంగా ఉండాలని భావిస్తున్నారు.