బండ్ల గణేష్ ‘డేగల బాబ్జీ’ ట్రైలర్‌ విడుదల

ప్రముఖ కమెడియన్, సినీ నిర్మాత బండ్ల గణేష్ ప్రధాన పాత్ర పోషిస్తున్న ‘డేగల బాబ్జీ’ మూవీ ట్రైలర్‌ను సోమవారం ఉదయం దర్శకుడు పూరీ జగన్నాథ్ విడుదల చేశాడు. యష్ రిషి ఫిలింస్ పతాకంపై నిర్మితమవుతున్న ఈ సినిమాకు వెంకట్ చంద్ర దర్శకత్వం వహిస్తున్నాడు. తమిళంలో పార్తీబన్ హీరోగా నటించిన ‘ఒత్తుసెరుప్పు సైజ్ 7’ చిత్రానికి రీమేక్‌గా ఈ మూవీ తెరకెక్కుతోంది. ఈ ట్రైలర్‌లో ఓ హత్య కేసులో ఆరోపణలు ఎదుర్కొంటూ జైలుకెళ్లిన ‘డేగల బాబ్జీ’ పాత్రలో బండ్ల గణేష్ నటన ఆకట్టుకుంటోంది.

ఈ ట్రైలర్‌లో ‘అసలు మా అమ్మ అందంగా ఉండాలన్న ఏమైనా ఉందా?’, ‘పుట్టగానే వాడు ఏడవలేదు.. అందుకే వాడు పుట్టినప్పటి నుంచి మేం ఏడుస్తూనే ఉన్నాం’ అనే డైలాగులు బాగున్నాయి. మరోవైపు ఈ మూవీలో అన్ని రకాల ఎమోషన్స్‌ను పండిస్తూ బండ్ల గణేష్ చూపించిన హావభావాలు మెప్పించేలా ఉన్నాయి. త్వరలోనే ఈ సినిమా థియేటర్లలో విడుదల కానుంది.