Asian Legends League: ప్రారంభమైన లెజెండ్స్ టీ20 లీగ్.. ఆగస్టు 2న హై ఓల్టేజ్ మ్యాచ్..

ఏషియన్ లెజెండ్స్ లీగ్ రెండవ సీజన్ అధికారికంగా ప్రారంభమైంది. మొదటి సీజన్ సాధించిన ఘన విజయాన్ని దృష్టిలో ఉంచుకుని, ఈసారి ఈ లీగ్ మరింత భారీ స్థాయిలో అలరించేందుకు సిద్ధమైంది. మొదట ఈ టోర్నమెంట్ కేన్యాలోని నైరోబీలో జరగాల్సి ఉన్నప్పటికీ, షెడ్యూల్ మార్పుల కారణంగా జూలై-ఆగస్టు నెలల్లో జాంబియాలోని లోటస్ స్పోర్ట్స్ క్లబ్ గ్రౌండ్‌లో నిర్వహించబడుతోంది. మొత్తం 19 టీ20 మ్యాచ్‌లు జరగనున్న ఈ టోర్నీలో తొలి పోరు శ్రీలంక లయన్స్, ఆఫ్ఘనిస్తాన్ పఠాన్స్ జట్ల మధ్య జరిగింది. దీనిలో శ్రీలంక విజయం సాధించింది.

విశ్రాంత ఆటగాళ్ల ఆసియా కప్‌గా ప్రసిద్ధి చెందిన ఈ లీగ్‌లో కేవలం ఆసియా దేశాల మాజీ అంతర్జాతీయ క్రికెటర్లు మాత్రమే పాల్గొంటున్నారు. ఈ సీజన్‌లో ఇండియన్ రాయల్స్, పాకిస్తాన్ పాంథర్స్, శ్రీలంకన్ లయన్స్, ఆఫ్ఘనిస్తాన్ పఠాన్స్, బంగ్లాదేశ్ టైగర్స్ మరియు రెస్ట్ ఆఫ్ ఆసియన్ స్టార్స్ అనే ఆరు ఫ్రాంచైజీ జట్లు తలపడుతున్నాయి.

ఈ టోర్నమెంట్‌లో అత్యంత ఆసక్తికరమైన, హై-వోల్టేజ్ మ్యాచ్ ఆగస్టు 2న ఇండియన్ రాయల్స్ మరియు పాకిస్తాన్ పాంథర్స్ మధ్య జరగనుంది. ఈ ప్రత్యర్థుల పోరు కోసం అభిమానులు ఎంతో ఆసక్తిగా ఎదురుచూస్తున్నారు. ఇండియన్ రాయల్స్ తరఫున శిఖర్ ధావన్, సురేష్ రైనా, దినేష్ కార్తీక్, హర్భజన్ సింగ్, యూసుఫ్ పఠాన్, అంబటి రాయుడు, రిషి ధావన్, స్టువర్ట్ బిన్నీ వంటి దిగ్గజాలు మైదానంలోకి దిగుతున్నారు. అలాగే పాకిస్తాన్ పాంథర్స్ జట్టులో మహమ్మద్ హఫీజ్, షోయబ్ మాలిక్, వహాబ్ రియాజ్, సయీద్ అజ్మల్, కమ్రాన్ అక్మల్, సోహైల్ తన్వీర్ వంటి ఆటగాళ్లు ఉన్నారు. వీరితో పాటు తిసారా పెరీరా, తిలకరత్నే దిల్షాన్, షకీబ్ అల్ హసన్, అస్గర్ అఫ్గాన్ లాంటి ఆసియా క్రికెట్ దిగ్గజాలు కూడా ఈ లీగ్‌లో పాల్గొంటున్నారు. ఈ మ్యాచ్‌లు ప్రపంచవ్యాప్తంగా లైవ్ స్ట్రీమింగ్ ద్వారా ప్రసారం కానున్నాయి.