Holiday Changed: మిలాద్ ఉన్ నబీ సెలవు తేదీ మార్పు.. ఉత్తర్వులు జారీ చేసిన ప్రభుత్వం..

ఆంధ్రప్రదేశ్ ప్రభుత్వం మిలాద్‌-ఉన్‌-నబి పండుగ సాధారణ సెలవు తేదీని సవరిస్తూ కీలక ఉత్తర్వులు జారీ చేసింది. అకడమిక్ క్యాలెండర్, మునుపటి ఉత్తర్వుల ప్రకారం ఆగస్టు 25న (మంగళవారం) ఇవ్వాల్సిన పబ్లిక్ హాలిడేను, తాజాగా ఆగస్టు 26వ తేదీకి (బుధవారం) మారుస్తూ ప్రభుత్వ ప్రధాన కార్యదర్శి జె. శ్యామల రావు అధికారిక జీవో విడుదల చేశారు.

నూతన చంద్ర దర్శనాన్ని పరిగణనలోకి తీసుకుని, ఇస్లామిక్ క్యాలెండర్ ఆధారంగా ఈ ఏడాది మిలాద్‌-ఉన్‌-నబి పండుగ ఆగస్టు 26న వస్తుందని ఏపీ స్టేట్ వక్ఫ్ బోర్డు సీఈఓ ప్రభుత్వానికి తెలియజేశారు. ముస్లిం మత పెద్దల అభ్యర్థన, వక్ఫ్ బోర్డు విజ్ఞప్తి మేరకు ప్రభుత్వం ఈ నిర్ణయం తీసుకుంది. మరోవైపు తెలంగాణ ప్రభుత్వం కూడా మిలాద్‌ ఉన్‌ నబీ సెలవును ఆగస్టు 26నే ఖరారు చేయడంతో రెండు తెలుగు రాష్ట్రాల్లోనూ ఒకే రోజున ఈ ప్రభుత్వ సెలవు అమల్లోకి రానుంది. ఈ మార్పును ఉద్యోగులు, ప్రజలు గమనించాలని అధికారులు సూచించారు.

అరబ్ భాషలో ‘మిలాద్’ అంటే జన్మదినం, ‘నబి’ అంటే ప్రవక్త అని అర్థం. ఇస్లాం మత స్థాపకుడైన ముహమ్మద్ ప్రవక్త జన్మదినం సందర్భంగా ఇస్లామిక్ క్యాలెండర్ మూడో నెల రబీ-ఉల్-అవ్వల్‌లో ఈ పండుగను ముస్లింలు పవిత్రంగా జరుపుకుంటారు. ఈ వేడుకల వేళ పేదలకు అన్నదానం చేయడం, వస్త్రాలు పంపిణీ చేయడం వంటి సేవా కార్యక్రమాలు నిర్వహిస్తారు.

ఇదే నెలలో ఆంధ్రప్రదేశ్ ప్రభుత్వం వరలక్ష్మీ వ్రతం సందర్భంగా శుక్రవారం రోజున ప్రభుత్వ కార్యాలయాలు, పాఠశాలలకు సాధారణ సెలవు ప్రకటించింది. అలాగే ఆగస్ట్ 28 (శుక్రవారం) శ్రావణ పూర్ణిమ లేదా రాఖీ సందర్భంగా ఉద్యోగులకు ఆప్షనల్ హాలిడే అందుబాటులో ఉంటుంది. ఆగస్టు 30 సాధారణ ఆదివారం సెలవుగా ఉంటుంది. ప్రతి ఏటా ముందే ప్రకటించే సెలవుల పట్టికలో స్థానిక వేడుకలు, వాతావరణ పరిస్థితులు లేదా పరిపాలనాపరమైన కారణాల వల్ల ఏవైనా మార్పులు ఉంటే ప్రభుత్వం అధికారిక ఉత్తర్వుల ద్వారా వెల్లడిస్తుంది.