నిత్యావసర సరుకుల ధరల నియంత్రణపై ఆంధ్రప్రదేశ్ ముఖ్యమంత్రి చంద్రబాబు నాయుడు ఉన్నతాధికారులకు కీలక ఆదేశాలు జారీ చేశారు. ధరల పెరుగుదలపై నిరంతర పర్యవేక్షణ ఉండాలని స్పష్టం చేసిన సీఎం, ఏడాది కాలానికి సమగ్ర కార్యాచరణ ప్రణాళిక సిద్ధం చేయాలని ఆదేశించారు. అధికారులు ప్రతి వారం ధరల పరిస్థితిపై సమీక్ష నిర్వహించాలని సూచించారు. సామాన్యులపై ధరల భారం పడకుండా ఉండేందుకు డిసెంబర్ 1 నుంచి రాష్ట్రంలోని రేషన్ షాపుల ద్వారా కిలో కందిపప్పు రూ.100, కిలో గోధుమ పిండి రూ.25, లీటర్ పామాయిల్ రూ.125 చొప్పున విక్రయించాలని నిర్ణయించారు. అలాగే రైతు బజార్లలో కిలో ఉల్లి రూ.35కే విక్రయించే ప్రక్రియను కొనసాగించనున్నారు.
ప్రభుత్వం ‘ధరణి’ బ్రాండ్తో తక్కువ ధరకే నాణ్యమైన బియ్యాన్ని విక్రయిస్తుండగా, మొబైల్ వాహనాల ద్వారా కూడా ప్రజల వద్దకే వెళ్లి బియ్యం సరఫరా చేసేందుకు ఏర్పాట్లు చేయాలని సీఎం ఆదేశించారు. ధరల నియంత్రణ, మార్కెట్ ఇంటర్వెన్షన్ కోసం ప్రభుత్వం నెలకు రూ.100 కోట్లు ఖర్చు చేస్తోందని తెలిపారు. రాష్ట్రంలో బియ్యం నిల్వలు బ్లాక్ మార్కెట్కు తరలకుండా నిరంతర నిఘా పెట్టాలని, హోల్సేల్ డీలర్లు, మిల్లర్ల వద్ద ఉన్న నిల్వలపై అధికారులకు స్పష్టమైన సమాచారం ఉండాలని సూచించారు. ఈ క్రమంలో రైతులకు ఎలాంటి నష్టం జరగకూడదని, అదే సమయంలో వినియోగదారులపై ధరల భారం పడకూడదని సీఎం స్పష్టం చేశారు.
కందిపప్పు ధరల నియంత్రణతో పాటు భవిష్యత్ అవసరాలను దృష్టిలో ఉంచుకుని రాష్ట్రంలో కంది సాగును ప్రోత్సహించాలని అధికారులకు దిశానిర్దేశం చేశారు. నాసిక్ రకం ఉల్లి సాగుకు అనువైన ప్రాంతాలను గుర్తించి రైతులకు అవగాహన కల్పించాలని సూచించారు. నిత్యావసరాలతో పాటు కూరగాయల ధరలు కూడా పెరగకుండా తగిన చర్యలు తీసుకోవాలని, ఇందుకోసం మార్కెట్ వాచ్, అగ్రీవాచ్ నిరంతరం కొనసాగించాలని ఆదేశించారు. ధరల నియంత్రణపై జిల్లాల వారీగా కలెక్టర్లతో సమావేశాలు నిర్వహించాలని, అక్రమ నిల్వలు, రవాణాపై విజిలెన్స్ నిఘాను మరింత పెంచాలని డీజీపీని సీఎం ఆదేశించారు.

