Anushka Shetty Birthday: బర్త్డే గిఫ్ట్గా.. ఆ బ్లాక్ బస్టర్ మూవీ పార్ట్-2 ప్రకటన రానుందా?
Will Anushka Shetty’s Bhaagamathie Part 2 Announced: ‘అనుష్క శెట్టి’.. ఈ పేరును తెలుగు సినీ ప్రేక్షకులకు ప్రత్యేకంగా పరిచయం చేయాల్సిన అవసరం లేదు. డాషింగ్ డైరెక్టర్ పూరి జగన్నాధ్ దర్శకత్వంలో నాగార్జున ప్రధాన పాత్రలలో వచ్చిన `సూపర్` సినిమాతో అనుష్క వెండి తెరకు పరిచయం అయ్యారు. సూపర్ సినిమాలో సాషా క్యారక్టర్తో అందరిని ఆకర్షించారు. ఆపై రాజమౌళి దర్శకత్వంలో వచ్చిన ‘విక్రమార్కుడు’ చిత్రంతో భారీ విజయాన్ని ఖాతాలో వేసుకున్నారు. విక్రమార్కుడు సినిమా తరువాత అనుష్క కెరీర్ పూర్తిగా మారిపోయింది. ఓవైపు అగ్ర హీరోల సినిమాల్లో నటిస్తూ.. మరోవైపు లేడి ఓరియెంటెడ్ చిత్రాలతో ప్రేక్షకుల మనసు దోచుకున్నారు. అనుష్క 18 ఏళ్లుగా సినీ పరిశ్రమలో ‘రారాణి’గా వెలుగొందుతున్నారు.
చిత్ర పరిశ్రమలోకి వచ్చిన కొత్తలో గ్లామర్ పాత్రలు చేసిన అనుష్క శెట్టి.. తర్వాత హీరోయిన్ ఓరియంటెడ్ సినిమాలతో తానేంటో నిరూపించుకున్నారు. ముఖ్యంగా ‘అరుంధతి’ సినిమా అనుష్క సినీ జీవితాన్ని మార్చేసింది. హారర్ మూవీలలో అరుంధతి ఓ ట్రెండ్ సెట్టర్గా నిలిచిపోయింది. ఈ సినిమా తరువాత టాలీవుడ్లో లేడీ ఓరియెంట్ చిత్రాలకు కేర్ అఫ్ అడ్రస్ అయ్యారు అనుష్క. అరుంధతి అనంతరం రుద్రమదేవి, భాగమతి, సైజ్ జీరో సినిమాలతో మరో మెట్టు ఎక్కారు. ఇందులో భాగమతి సినిమా బ్లాక్బస్టర్గా నిలిచింది. ఇప్పుడు ఆ సినిమాకు సీక్వెల్ రానున్నట్లు తెలుస్తోంది.
Also Read: Road Accident: రోడ్డు ప్రమాదాల నుంచి త్రుటిలో బయటపడ్డ ఇద్దరు మాజీ సీఎంలు!
నేడు అనుష్క శెట్టి పుట్టినరోజు. నేటి ఆమె 43వ వసంతంలోకి అడుగుపెట్టనున్నారు. అనుష్క బర్త్డే సందర్భంగా భాగమతి 2 గురించి యూవీ క్రియేషన్స్ అధికారికంగా ప్రకటించే అవకాశం ఉంది. భాగమతి 2 గురించి అప్ డేట్ ఇచ్చే అవకాశం ఉంది. ఈ సినిమా ప్రకటన అధికారికంగా వస్తే.. అనుష్క కెరియర్లో 50వ చిత్రంగా తెరకెక్కుతుంది. మొదటి పార్ట్లో పార్ట్-2 ఉంటుందని హింట్ ఇచ్చిన విషయం తెలిసిందే. అశోక్ జీ దర్శకత్వం వహించిన ఈ సినిమాలో మురళీ శర్మ, ఉన్ని ముకుందన్, జయరామ్, ఆశా శరత్ కీలక పాత్రలు పోషించారు.