Anil Ravipudi : అనిల్ రావిపూడి మార్క్ మల్టీస్టారర్.. ‘బావమరిది’ పాత్రలో ఆ తమిళ హీరో!
టాలీవుడ్ సక్సెస్ ఫుల్ డైరెక్టర్ అనిల్ రావిపూడి, విక్టరీ వెంకటేష్ కాంబినేషన్ అంటేనే ప్రేక్షకుల్లో ఒక రేంజ్ అంచనాలు ఉంటాయి. ఇప్పటికే వీరిద్దరూ కలిసి చేసిన సినిమాలు బాక్సాఫీస్ వద్ద నవ్వుల పువ్వులు పూయించాయి. ఇప్పుడు ఈ హిట్ కాంబోలో మూడవ సినిమా సిద్ధమవుతోంది. అయితే, ఈసారి కేవలం ఫన్ మాత్రమే కాదు, ఒక క్రేజీ మల్టీస్టారర్ ఎలిమెంట్ కూడా ఉండబోతోందని సమాచారం.
అయితే ఈ ప్రాజెక్టులో వెంకటేష్ సరసన ఒక కీలకమైన ‘బావమరిది’ పాత్ర ఉందట. ఈ పాత్ర కోసం అనిల్ రావిపూడి మొదట మలయాళ నటుడు ఫహద్ ఫాసిల్ను అనుకున్నప్పటికీ, లేటెస్ట్ సమాచారం ప్రకారం తమిళ హీరో కార్తీ వైపు మొగ్గు చూపుతున్నారట. కార్తీకి తెలుగులో ఉన్న ఫాలోయింగ్, ఆయన కామెడీ టైమింగ్ ఈ సినిమాకు ప్లస్ అవుతాయని చిత్ర యూనిట్ భావిస్తోంది. గతంలో ‘ఊపిరి’ సినిమాతో తెలుగు వారి మనసు గెలుచుకున్న కార్తీ, ఈ ప్యూర్ ఫన్ ఎంటర్టైనర్ కు గ్రీన్ సిగ్నల్ ఇస్తే ఈ ప్రాజెక్ట్ విలువ మరింత పెరుగుతుంది.
సాహు గారపాటి నిర్మాణంలో రాబోతున్న ఈ చిత్రానికి ఒక విభిన్నమైన టైటిల్ను పరిశీలిస్తున్నట్లు టాక్. ప్రస్తుతం ‘ఆదర్శ కుటుంబం’ షూటింగ్లో ఉన్న వెంకటేష్, ఆ తర్వాత వెంటనే ఈ ప్రాజెక్టును పట్టాలెక్కించనున్నారు. ఉగాది పర్వదినాన ఈ సినిమాను గ్రాండ్గా లాంచ్ చేసేందుకు ప్లాన్ చేస్తున్నారు. కార్తీ వరుసగా సీరియస్ పాత్రలు చేస్తున్న తరుణంలో, అనిల్ రావిపూడి సినిమా ఆయనకు కూడా ఒక మంచి బ్రేక్ అవుతుందని విశ్లేషకులు భావిస్తున్నారు.