Novak Djokovic Out From US Open 2024: యూఎస్‌ ఓపెన్‌ 2024లో మరో సంచలనం నమోదైంది. టెన్నిస్ దిగ్గజం, సెర్బియా స్టార్ నొవాక్ జకోవిచ్‌ ఇంటిదారి పట్టాడు. మూడో రౌండ్‌లో ఆస్ట్రేలియాకు చెందిన 28వ సీడ్‌ అలెక్సీ పాప్రియన్ చేతిలో 6-4, 6-4, 2-6, 6-4 తేడాతో రెండో సీడ్‌ జకోవిచ్‌ ఓటమి పాలయ్యాడు. 18 ఏళ్లలో యూఎస్‌ ఓపెన్‌ నాలుగో రౌండ్‌కు చేరకుండానే జకో నిష్క్రమించడం గమనార్హం. ఆర్థర్ యాష్ స్టేడియంలో ఇద్దరి మధ్య 3 గంటల 19 నిమిషాల పాటు హోరాహోరీ పోరు సాగింది.
అలెక్సీ పాప్రియన్ ముందు నోవాక్ జకోవిచ్‌ పూర్తిగా తేలిపోయాడు. తొలి రెండు సెట్లను కోల్పోయిన జకో.. మూడో సెట్‌ను కైవసం చేసుకొని రేసులోకి వచ్చాడు. ఈ సమయంలో పుంజుకున్న పాప్రియన్.. జకోవిచ్‌ జోరుకు అడ్డుకట్ట వేశాడు. నాలుగో సెట్‌తో పాటు మ్యాచ్‌ను కూడా సొంతం చేసుకుని తదుపరి రౌండ్‌కు దూసుకెళ్లాడు. రికార్డు స్థాయిలో 25వ గ్రాండ్‌స్లామ్ టైటిల్‌ సాధించాలని చూసిన జకోకు నిరాశే ఎదురైంది.
Also Read: Today Gold Price: వరుసగా రెండోరోజు తగ్గిన బంగారం ధరలు.. భారీగా పతనమైన వెండి!
ప్రపంచ మూడో ర్యాంకర్ కార్లోస్ అల్‌కరాజ్‌ రెండో రౌండ్‌లోనే నిష్క్రమించిన విషయం తెలిసిందే. నెదర్లాండ్స్‌కు చెందిన 74వ ర్యాంకర్ బొటిక్ వాన్‌ డి జాండ్‌స్కల్ప్‌ చేతిలో ఓడిపోయాడు. బొటిక్ 6-1, 6-5, 6-4 తేడాతో వరుస సెట్లలో అల్‌కరాజ్‌పై విజయం సాధించాడు. అల్‌కరాజ్‌, జకోవిచ్‌ ఇంటిదారి పట్టడంతో యూఎస్‌ ఓపెన్‌లో కొత్త ఛాంపియన్లు అవతరించేలా ఉన్నారు.
