Afghanistan Tri Series Win: అద్భుత ఫామ్‌తో దూసుకుపోతున్న ఆఫ్ఘనిస్థాన్.. ట్రై సిరీస్ కైవసం..

బాంగ్లాదేశ్, జింబాబ్వే జట్లతో జరిగిన ముక్కోణపు సిరీస్ ఫైనల్ మ్యాచ్‌లో ఆప్ఘనిస్థాన్ జట్టు అద్భుత విజయాన్ని సాధించి ట్రోఫీని గెలుచుకుంది. 2027 ఐసీసీ పురుషుల వన్డే ప్రపంచకప్‌నకు ఇంకా ఏడాది సమయం మాత్రమే ఉన్న నేపథ్యంలో, ఆప్ఘనిస్థాన్ క్రికెట్ జట్టు తరచూ అద్భుత ప్రదర్శనలతో ఆకట్టుకుంటోంది. యువ ఆటగాళ్లు బిలాల్ సమీ, అల్లాహ్ మహమ్మద్ గజన్‌ఫర్ లతో ఈ జట్టు మరింత బలంగా తయారైంది.

ఈ మ్యాచ్‌లో టాస్ గెలిచి మొదట బ్యాటింగ్ చేసిన జింబాబ్వే జట్టును ఆప్ఘన్ బౌలర్లు తక్కువ పరుగులకే పరిమితం చేశారు. ప్రారంభంలోనే ఫజల్హక్ ఫరూకీ, అజ్మతుల్లా ఒమర్‌జాయ్ ధాటికి జింబాబ్వే 26 పరుగులకే 3 వికెట్లు కోల్పోయి కష్టాల్లో పడింది. సికిందర్ రజా (68), రయాన్ బర్ల్ (31) కాసేపు పోరాడి 60 పరుగుల భాగస్వామ్యం నెలకొల్పారు. అయితే రషీద్ ఖాన్ (3/41), మహమ్మద్ నబీ (2/25), బిలాల్ సమీ (2/27), ఫరూకీ (2/41) ధాటికి జింబాబ్వే కేవలం 169 పరుగులకే ఆలౌట్ అయింది.

170 పరుగుల సాధారణ లక్ష్యంతో బరిలోకి దిగిన ఆప్ఘనిస్థాన్ ఆరంభం నుంచే దూకుడుగా ఆడింది. ఓపెనర్ ఇబ్రహీం జద్రాన్ చక్కటి షాట్లతో అలరించగా, రెహమానుల్లా గుర్బాజ్ అతనికి మంచి సహకారం అందించాడు. పదో ఓవర్లో జట్టు స్కోరు 68 పరుగుల వద్ద గుర్బాజ్ అవుట్ అయ్యాడు. అనంతరం సిదిఖుల్లా అటల్ (6) కూడా త్వరగానే నిష్క్రమించాడు. అయితే తక్కువ లక్ష్యం ఉండటంతో ఆప్ఘన్ బ్యాటర్లు నిలకడగా ఆడారు.

ఆ తర్వాత కెప్టెన్ రహమత్ షా (43)తో కలిసి ఇబ్రహీం జద్రాన్ ఇన్నింగ్స్‌ను ముందుకు నడిపించాడు. జద్రాన్ నాటౌట్‌గా 70 పరుగులు చేసి జట్టును విజయతీరాలకు చేర్చాడు. ఆప్ఘనిస్థాన్ మరో 15 ఓవర్లు మిగిలి ఉండగానే 35వ ఓవర్లోనే విజయాన్ని ఖరారు చేసుకుంది. ఈ మ్యాచ్ విజయం ద్వారా ఆప్ఘన్ జట్టు ముక్కోణపు సిరీస్ విజేతగా నిలిచింది. ఇకపై ఆఫ్ఘనిస్థాన్, జింబాబ్వే జట్ల మధ్య షార్జా వేదికగా మూడు టి20లు, రెండు టెస్టు మ్యాచ్‌ల సిరీస్ జరగనుంది.