Ragi Breakfast Recipes: బరువు తగ్గడానికి రాగులతో చేసే 7 ఉత్తమ బ్రేక్‌ఫాస్ట్ రెసిపీలు ఇవే!

Ragi Breakfast Recipes: ఈ ఆధునిక సాంకేతిక ప్రపంచంలో ఆరోగ్యంపై శ్రద్ధపై వహించకపోతే అనారోగ్యం పాలు కావాల్సిందే అంటున్నారు వైద్య నిపుణులు. మధుమేహం, అధిక బరువు వంటి సమస్యలు వేధిస్తున్న తరుణంలో మన పూర్వీకులు వారి ఆహారంలో భాగం చేసుకున్న ‘సిరిధాన్యాలు’ మళ్లీ ప్రాధాన్యతను సంతరించుకుంటున్నాయి. అందులోనూ ‘రాగులు’ (చిరుధాన్యాల రారాజు) పోషకాల గని. మరి వారమంతా బోర్ కొట్టకుండా, రాగులతోనే అదిరిపోయే ఏడు రకాల అల్పాహారాలు ఎలా చేసుకోవాలో ఈ స్పెషల్ స్టోరీలో తెలుసుకుందాం!

READ ALSO: IND vs PAK: పాకిస్తాన్ పై ఇషాన్ కిషన్ మెరుపు బ్యాటింగ్.. యువరాజ్ సింగ్‌ రికార్డ్ బ్రేక్

1. మృదువైన రాగి ఇడ్లీ & క్రిస్పీ దోశ
రాగులు, మినప్పప్పు, అటుకులను నానబెట్టి మెత్తగా రుబ్బుకోవాలి. దీనివల్ల ఇడ్లీలు దూదిలా మృదువుగా వస్తాయి. అదే పిండితో మరుసటి రోజున పల్చగా దోశలు వేసుకుంటే హోటల్ స్టైల్‌లో క్రిస్పీగా ఉంటాయి. రాగులు అందుబాటులో లేని వారు రాగి పిండితో కూడా సింపుల్‌గా ఇడ్లీలు తయారు చేసుకోవచ్చు.

2. రాగి రొట్టె..
రాగి పిండిలో సన్నగా తరిగిన ఉల్లిపాయలు, పచ్చిమిర్చి, జీలకర్ర, కొత్తిమీర కలిపి తడి క్లాత్‌పై రొట్టెలా ఒత్తుకోవాలి. పెనంపై నెయ్యితో కాల్చుకుంటే వచ్చే ఆ రుచి వర్ణనాతీతం. ఇందులో మునగాకు లేదా క్యారెట్ తురుము కలిపితే పోషకాలు రెట్టింపు అవుతాయి.

3. తియ్యని రాగి పాన్ కేక్స్
పిల్లలకు ఎంతో ఇష్టమైన ఈ పాన్ కేక్స్‌ను రాగి పిండి, అరటిపండు, బెల్లం మిశ్రమంతో తయారు చేస్తారు. వీటిలో అటుకులు కలపడం వల్ల ఎంతో సాఫ్ట్‌గా ఉంటాయి. బ్రేక్‌ఫాస్ట్‌గానే కాకుండా సాయంత్రం స్నాక్స్‌లా కూడా ఇవి అద్భుతంగా పని చేస్తాయి.

4. ఇన్‌స్టంట్ రాగి రవ్వ దోశ
తక్షణమే అల్పాహారం కావాలనుకునే వారికి ఇది వరం. రాగి పిండిలో బొంబాయి రవ్వ, పెరుగు, ఉల్లిపాయ ముక్కలు కలిపి పల్చగా రవ్వ దోశలా వేసుకోవచ్చు. హోటల్‌లో దొరికే రవ్వ దోశ కంటే ఇది ఎంతో రుచిగా, ఆరోగ్యకరంగా ఉంటుంది.

5. రాగి డ్రై ఫ్రూట్ మాల్ట్ 
బాదం, జీడిపప్పు, వాల్‌నట్స్, వివిధ రకాల విత్తనాలతో (Seeds) కలిపి తయారు చేసే ఈ డ్రింక్ రోజంతా ఉత్సాహంగా ఉంచుతుంది. తాటి బెల్లం కలిపి తీసుకుంటే బరువు తగ్గాలనుకునే వారికి ఇది ఒక సంపూర్ణ ఆహారంగా పని చేస్తుందని చెబుతున్నారు.

6. రాగి ఆవిరి కుడుము
రాగులు, మినప్పప్పు కలిపి రుబ్బిన పిండిని ఆవిరిపై ఉడికించి తయారు చేసే ఈ కుడుములు సులభంగా జీర్ణమవుతాయి. చిన్న పిల్లల నుంచి వృద్ధుల వరకు ఎవరైనా నిశ్చింతగా వీటిని భుజించవచ్చు.

7. రాగి పిండితో మెత్తని ఇడ్లీలు
రాగులు నానబెట్టే సమయం లేనప్పుడు.. నేరుగా రాగి పిండిని మినప్పిండిలో కలిపి కూడా ఇడ్లీలు సిద్ధం చేసుకోవచ్చు. ఇవి కూడా అంతే రుచిగా ఉండటమే కాకుండా సమయాన్ని ఆదా చేస్తాయి.

“ఆరోగ్యమే మహాభాగ్యం” అన్న సూక్తిని పాటిస్తూ.. వారానికి సరిపడా ఈ ఏడు రకాల రాగి వంటకాలను మీ రోజువారీ ఆహారంలో భాగం చేసుకోండి. ఇవి కేవలం రుచిని మాత్రమే కాకుండా, ఆరోగ్యకరమైన జీవనానికి విశేషంగా ఉపయోగపడుతాయని అంటున్నారు. మీ ఇంట్లో కూడా కుదిరినప్పుడు ట్రై చేసి చూడండి.

READ ALSO: China: కెనడా, బ్రిటన్‌లకు చైనా ‘వీసా’ గిఫ్ట్.. ‘ఫైవ్ ఐస్’ కూటమిలో మిగిలింది అమెరికా మాత్రమే!