దేశ వ్యాప్తంగా వినాయక చవితి ఉత్సవాలు ఘనంగా సాగుతున్నాయి. ఊరు, వాడ మొత్తం గణేశుని నామస్మరణతో మారుమోగుతోంది. లంబోధరుడిని వివిధ రూపాల్లో కొలువుతీర్చి భక్తులు ప్రత్యేక పూజలు నిర్వహిస్తున్నారు. గణేష్ మండపాల వద్ద విద్యుత్ కాంతుల శోభతో ప్రత్యేక కళను సంతరించుకున్నాయి. ఏ గ్రామంలో చూసినా వివిధ రూపాల్లో వినాయకుని విగ్రహాలు కళకళలాడుతున్నాయి. గణేష్ మండపాల వద్దకు పెద్ద ఎత్తున చేరుకుని భక్తులు పూజలను నిర్వహిస్తున్నారు. పది రోజుల పాటు జరిగే ఈ ఉత్సవం.. సెప్టెంబర్ 17న గణేష్ నిమజ్జనంతో ముగుస్తుంది.
ఇదిలా ఉంటే.. గణేష్ ఉత్సవాలు మొదలవగానే అతిపెద్ద వినాయకుడి విగ్రహాలు ఎక్కడున్నాయి.. ఏ ప్రాంతంలో భారీ గణనాథులను ఏర్పాటు చేశారనే ప్రశ్నలు మొదలవుతాయి. అయితే.. మన భారతదేశంలోనే కాదు వేరే దేశంలో కూడా గణపతి భారీ విగ్రహం ఉంది. అది ఎక్కడంటే.. థాయిలాండ్, ఖ్లాంగ్ ఖ్వాన్ ప్రాంతంలోని గణేష్ ఇంటర్నేషనల్ పార్క్లో ఏర్పాటు చేశారు. ఈ విగ్రహం 128 అడుగులు.. ఇది ప్రపంచంలోనే అత్యంత ఎత్తైన గణేష్ విగ్రహంగా గుర్తింపు పొందింది.
Delhi: ఢిల్లీలో బాణాసంచా తయారీ, ఆన్లైన్ విక్రయాలపై నిషేధం..
ఈ విగ్రహాన్ని ఎప్పుడు స్థాపించారు:
థాయ్లాండ్లోని చాచోయింగ్షావో నగరం.. సిటీ ఆఫ్ గణేశ్ పేరుతో ప్రసిద్ధి చెందింది. ఇక్కడ 3 భారీ వినాయకుడి విగ్రహాలు ఉన్నాయి. వాటిలో ఒకటి అతి పెద్దది. ఈ విగ్రహాన్ని 2012 సంవత్సరంలో ఖ్లాంగ్ ఖ్వెన్ ప్రాంతంలోని గణేష్ ఇంటర్నేషనల్ పార్క్లో స్థాపించారు. దీని నిర్మాణానికి దాదాపు నాలుగు సంవత్సరాలు పట్టింది. విగ్రహం తయారీ పనులు 2008 నుండి 2012 వరకు జరిగాయి. ఈ భారీ విగ్రహాన్ని కాంస్యంతో నిర్మించారు. విగ్రహం యొక్క ప్రత్యేకత ఏమిటంటే.. తల భాగంలో తామర పువ్వు.. మధ్యలో ఓం చిహ్నం ఉంటుంది. ఈ గణనాథుడిని నిలుచుని ఉన్నట్లు తయారు చేశారు. విగ్రహానికి నాలుగు చేతులు ఉంటాయి.
ఈ భారీ విగ్రహంతో పాటు గణేష్ ఇంటర్నేషనల్ పార్క్లో మొత్తం 32 వినాయక విగ్రహాలు వివిధ భంగిమల్లో తయారు చేశారు. ఇక్కడ ఒక మ్యూజియం కూడా ఉంది. అందులో మీరు గణేశ విగ్రహాలు, గణేశుడి వివిధ రూపాల గురించి తెలుసుకోవచ్చు. థాయ్లాండ్తో పాటు.. ఈ పార్క్ కు ప్రపంచం నలుమూలల నుండి వచ్చే పర్యాటకులకు కేంద్రంగా మారింది. థాయ్లాండ్లో బౌద్ధమతాన్ని అనుసరించే వారి సంఖ్య ఎక్కువగా ఉన్నప్పటికీ.. ఇక్కడి ప్రజలు గణేశుడిపై అమితమైన విశ్వాసం కలిగి ఉంటారు. గణేష్ చవితి వంటి ప్రత్యేక సందర్భాలలో ఈ పార్కు, ఆలయానికి పెద్ద సంఖ్యలో భక్తులు వస్తుంటారు.
ఈ పార్క్లో 128 అడుగుల ఎత్తైన గణేశ విగ్రహమే కాకుండా.. ఫాంగ్ అకత్ టెంపుల్లో 49 మీటర్ల ఎత్తైన గణేశ విగ్రహం ఏర్పాటు చేశారు. అక్కడ గణేశుడు కూర్చున్నట్లు తయారు చేశారు. ఈ విగ్రహాన్ని చాలా అందంగా.. రంగులతో అలంకరించారు. అంతే కాకుండా.. సమన్ వత్తనారం ఆలయంలో 16 మీటర్ల ఎత్తు, 22 మీటర్ల పొడవు గల గణేశుడి విగ్రహాన్ని ప్రతిష్టించారు. ఇందులో వినాయకుడు సగం శయన స్థితిలో ఉన్నాడు. ఈ విగ్రహం కూడా చాలా అందంగా ఉంది. ప్రకాశవంతమైన రంగులతో ఈ విగ్రహానికి అలంకరించారు.
128 feet tall, the World’s Tallest standing Ganesha Murti at Khlong Khuean Ganesh International Park, Thailand. pic.twitter.com/ARzvHQNpEq
— Lost Temples™ (@LostTemple7) September 9, 2024
