Leader Of Opposition: 10 ఏళ్ల తరువాత తొలిసారిగా లోక్‌సభలో ప్రతిపక్ష నేత వచ్చారు. రాహుల్ గాంధీని కాంగ్రెస్ ప్రతిపక్ష నేతగా ఎన్నుకుంది. సాధారణంగా లోక్‌సభలోని మొత్తం స్థానాల్లో 10 శాతం సీట్లు గెలిచిన పార్టీకి ప్రతిపక్ష హోదా ఇస్తారు. ఈ సారి కాంగ్రెస్ 99 స్థానాల్లో విజయం సాధించింది. దీంతో ప్రతిపక్ష హోదాను దక్కించుకుంది. ఈ నేపథ్యంలో రాహుల్ గాంధీ లోక్‌సభలో ప్రతిపక్ష నేతగా ఎన్నికయ్యారు.
పార్లమెంటు చట్టం, 1977లో ప్రతిపక్ష నాయకుల జీతాలు మరియు అలవెన్సుల ప్రకారం రాహుల్ గాంధీ జీతం పొందుతారు. అనేక సౌకర్యాలను కలిగి ఉంటారు. ప్రతిపక్ష నేత సభలో ఎడమ వైపు ముందు వరసలో కూర్చుంటారు. గాంధీ కుటుంబంలో రాజీవ్ గాంధీ, సోనియా గాంధీల తర్వాత ప్రతిపక్ష నేతగా రాహుల్ గాంధీ ఎన్నికయ్యారు.
ప్రతిపక్ష నేతగా రాహుల్ గాంధీ అధికారాలు..?
10 ఏళ్ల తర్వాత తొలిసారిగా లోక్‌సభలో ప్రతిపక్ష నేతను చూస్తున్నాం. ప్రతిపక్ష పాత్ర లేకుండా ప్రభుత్వం కొన్ని నిర్ణయాలు తీసుకోవడం కష్టంగా మారుతుంది. రాహుల్ గాంధీకి ప్రతిపక్ష నాయకుడిగా క్యాబినెట్ మంత్రి హోదా, జీతం, అలవెన్స్ లభిస్తాయి. జీతం రూ. 3.3 లక్షలు లభిస్తుంది. కేబినెట్ మంత్రికి ఉండే భద్రత కల్పిస్తారు. ఇందులో Z+ సెక్యూరిటీ కూడా ఉంటుంది. కేబినెట్ మంత్రి తరహా ప్రభుత్వ బంగ్లా ఉంటుంది.
ప్రధాన ఎన్నిక కమిషనర్, ఇద్దరు ఎన్నికల కమిషనర్లను నియమించే త్రి సభ్య ప్యానెల్‌లో రాహుల్ గాంధీ ఇప్పుడు మూడో సభ్యుడిగా ఉంటారు. సీబీఐ, ఈడీ, సీవీసీ వంటి కేంద్ర సంస్థల చీఫ్‌లను ఎంపిక చేసే కమిటీలో సభ్యుడిగా రాహుల్ గాంధీకి ఎక్కువ అధికారాలు ఉంటాయి. త్రి సభ్య కమిటీని ప్రధాని నరేంద్రమోడీ లీడ్ చేస్తారు. భారత ప్రధాన న్యాయమూర్తి లేదా సుప్రీంకోర్టు న్యాయమూర్తి ఉంటారు. వీరిని ప్రధాని సిఫారసు చేస్తారు.