Tamil Nadu CM Visits Puzhal Central Jail: చెన్నైలోని పుజల్ సెంట్రల్ జైలులో తమిళనాడు ముఖ్యమంత్రి విజయ్ ఆకస్మికంగా తనిఖీ నిర్వహించారు. దేశంలోని అతిపెద్ద జైలు సముదాయాల్లో ఒకటైన పుజల్ జైలును సందర్శించిన సీఎం.. అక్కడ ఖైదీలకు అందుతున్న సౌకర్యాలు, ఆహారం, వైద్య సేవలు, మౌలిక వసతులు, పునరావాస కార్యక్రమాలను స్వయంగా పరిశీలించారు. ఈ సందర్భంగా జైలు అధికారులతో మాట్లాడిన ముఖ్యమంత్రి విజయ్.. ఖైదీల సంక్షేమానికి తీసుకుంటున్న చర్యలపై వివరాలు అడిగి తెలుసుకున్నారు.
ఖైదీలతో నేరుగా మాట్లాడిన సీఎం
పర్యటనలో ముఖ్యమంత్రి విజయ్ ఖైదీలతో నేరుగా మాట్లాడారు. వారి సమస్యలు, అవసరాలు, జైలులో అందుతున్న సౌకర్యాలపై వారి అభిప్రాయాలను అడిగి తెలుసుకున్నారు. ఖైదీలకు అవసరమైన ప్రాథమిక సదుపాయాలు సక్రమంగా అందుతున్నాయా? వైద్య సేవలు ఎలా ఉన్నాయి? ఆహారం నాణ్యత ఎలా ఉంది? వంటి అంశాలపై సీఎం ఆరా తీసినట్లు అధికారిక ప్రకటనలో పేర్కొన్నారు.
ఆసుపత్రి, పునరావాస కేంద్రం పరిశీలన
పుజల్ సెంట్రల్ జైలు-1లోని పలు ప్రాంతాలను ముఖ్యమంత్రి విజయ్ పరిశీలించారు. ఇందులో ఏకాంత నిర్బంధ వార్డు, సందర్శకుల గది, ఆసుపత్రి, వ్యసన విముక్తి, పునరావాస కేంద్రం ఉన్నాయి. అలాగే ఖైదీలకు విద్య, నైపుణ్యాభివృద్ధి అందించేందుకు ఏర్పాటు చేసిన తరగతి గదులు, గ్రంథాలయం, అధునాతన కంప్యూటర్ శిక్షణ కేంద్రాన్ని కూడా సీఎం సందర్శించారు.
హై సెక్యూరిటీ బ్లాక్, ఉరి ప్రదేశం తనిఖీ
జైలు భద్రతా ఏర్పాట్లను కూడా ముఖ్యమంత్రి విజయ్ పరిశీలించారు. ఇందులో భాగంగా అత్యంత భద్రతా విభాగాన్ని, ఉరితీసే ప్రాంతాన్ని కూడా తనిఖీ చేసినట్లు అధికారిక ప్రకటన తెలిపింది. జైలు ప్రాంగణంలో ఉన్న పోలీస్ స్టేషన్తో పాటు వివిధ శిక్షణా కేంద్రాలను కూడా సీఎం పరిశీలించారు. ఖైదీలకు అందించే ఆహార నాణ్యతను ముఖ్యమంత్రి స్వయంగా పరిశీలించారు. ఆహారం తయారీ, నాణ్యత, ఖైదీలకు అందుతున్న విధానం గురించి అధికారులను అడిగి తెలుసుకున్నారు. ఖైదీలకు అందుతున్న ప్రాథమిక సౌకర్యాలు, ఆహారం, వైద్య సేవలు, వృత్తి శిక్షణ వంటి అంశాలను సీఎం సమీక్షించినట్లు ప్రభుత్వం తెలిపింది.
ఖైదీలు తయారు చేస్తున్న ఉత్పత్తుల పరిశీలన
జైలులోని వృత్తి శిక్షణా కేంద్రాన్ని సందర్శించిన ముఖ్యమంత్రి.. ఖైదీలు స్వయంగా తయారు చేస్తున్న వివిధ ఉత్పత్తులను పరిశీలించారు. వీటిలో కూరగాయల నిల్వ కోసం ఉపయోగించే ఇనుప ర్యాక్లు, కాగితపు కవర్లు, ఆఫీస్ ఫైల్ బోర్డులు, చేనేత ఉత్పత్తులు, కుట్టుపని విభాగంలో తయారు చేసిన వస్తువులు ఉన్నాయి. ఖైదీలకు శిక్షణ ఇవ్వడం ద్వారా వారిలో నైపుణ్యాలను పెంపొందించి, జైలు నుంచి విడుదలైన తర్వాత స్వయం ఉపాధి లేదా ఉద్యోగ అవకాశాలను పొందేలా చేయడం పునరావాస కార్యక్రమాల ప్రధాన లక్ష్యాల్లో ఒకటి.
ఖైదీల పునరావాసంపై దృష్టి
జైలు కేవలం శిక్షను అమలు చేసే ప్రదేశంగా కాకుండా, ఖైదీలలో మార్పు తీసుకురావడానికి, వారికి కొత్త నైపుణ్యాలను నేర్పడానికి పునరావాస కార్యక్రమాలు కూడా ముఖ్యమైనవిగా ప్రభుత్వం భావిస్తోంది. ఈ నేపథ్యంలో పుజల్ జైలులో నిర్వహిస్తున్న వృత్తి శిక్షణ, కంప్యూటర్ విద్య, చేనేత, కుట్టుపని, అడిక్షన్ రికవరీ ప్రోగ్రామ్స్ ను ముఖ్యమంత్రి విజయ్ పరిశీలించడం ప్రాధాన్యత సంతరించుకుంది.