Supreme Court: విద్యార్థి నిరసనకారులకు ఊరట.. మైనర్లు, నేర చరిత్ర లేని వారిని వెంటనే విడుదల చేయాలని సుప్రీంకోర్టు ఆదేశం

దేశవ్యాప్తంగా పరీక్షా పేపర్ లీక్‌లకు వ్యతిరేకంగా జరిగిన విద్యార్థుల నిరసనల నేపథ్యంలో అరెస్టైన విద్యార్థులకు సుప్రీంకోర్టు కీలక ఊరటనిచ్చింది. 18 ఏళ్లలోపు మైనర్లను, అలాగే ఎలాంటి నేర చరిత్ర (క్రిమినల్ యాంటీసిడెంట్స్) లేని విద్యార్థులను వెంటనే విడుదల చేయాలని అన్ని రాష్ట్ర ప్రభుత్వాలను సుప్రీంకోర్టు ఆదేశించింది.

ఎఫ్‌ఐఆర్‌లపై బలవంతపు చర్యలు వద్ద

భారత ప్రధాన న్యాయమూర్తి (సీజేఐ) జస్టిస్ సూర్యకాంత్ నేతృత్వంలోని ముగ్గురు న్యాయమూర్తుల ధర్మాసనం మధ్యంతర ఉత్తర్వులు జారీ చేసింది. ఢిల్లీ జంతర్ మంతర్‌తో పాటు పలు రాష్ట్రాల్లో జరిగిన నిరసనల్లో పాల్గొన్న విద్యార్థులపై నమోదైన ఎఫ్‌ఐఆర్‌లకు సంబంధించి ఎలాంటి బలవంతపు (Coercive) చర్యలు తీసుకోవద్దని రాష్ట్ర ప్రభుత్వాలు, పోలీసులకు ఆదేశించింది. ఈ ఆదేశాలు నిరసనల్లో పాల్గొన్న విద్యార్థులకు తాత్కాలిక రక్షణ కల్పించే ఉద్దేశంతో జారీ చేసినవని కోర్టు పేర్కొంది.

నేర చరిత్ర ఉన్న వారికి మినహాయింపు లేదు

అయితే, ఈ రక్షణ అందరికీ వర్తించదని సుప్రీంకోర్టు స్పష్టం చేసింది. ఇప్పటికే నేర చరిత్ర ఉన్నవారు లేదా ఇతర క్రిమినల్ కేసుల్లో ప్రమేయం ఉన్నవారికి ఈ ఉత్తర్వులు వర్తించవని ధర్మాసనం వెల్లడించింది.

శాంతియుత నిరసనలకు రాజ్యాంగ పరిరక్షణ

విద్యార్థులు తమ సమస్యలను శాంతియుతంగా వ్యక్తం చేసే హక్కు రాజ్యాంగం కల్పించిన హక్కేనని గత విచారణల్లో సుప్రీంకోర్టు స్పష్టం చేసింది. అదే సమయంలో, చట్టాన్ని అతిక్రమించిన వారిపై చట్టపరమైన చర్యలు తప్పవని కూడా కోర్టు పేర్కొంది.

విచారణ కొనసాగుతోంది

పరీక్షా పేపర్ లీక్‌లు, వాటికి వ్యతిరేకంగా జరిగిన నిరసనలు, పోలీసుల చర్యలకు సంబంధించిన పిటిషన్లపై సుప్రీంకోర్టు విచారణ కొనసాగిస్తోంది. ఈ కేసులో భవిష్యత్తులో నిరసనల నిర్వహణ, పోలీసుల చర్యలు, విద్యార్థుల హక్కుల పరిరక్షణకు సంబంధించి మరిన్ని కీలక మార్గదర్శకాలు వెలువడే అవకాశం ఉంది.