Monsoon Alert: ఆగస్టులో భారీ వర్షాలు.. బంగాళాఖాతంలో వరస అల్పపీడనాలు..

Monsoon Alert: భారత్‌లో రుతుపవనాల జోరు కనిపిస్తోంది. ఈ సీజన్‌లోనే ఆగస్టులో అత్యంత చురుకైన దశగా కనిపిస్తోంది. వాతావరణ అంచనాల ప్రకారం.. బంగాళాఖాతంలో ఆగస్టు చివరి వరకు అల్పపీడన వ్యవస్థలు ఏర్పడే అవకాశం ఉందని వాతావరణ సంస్థలు చెబుతున్నాయి. దీంతో దేశంలోని పలు ప్రాంతాల్లో విస్తారంగా వర్షాలు కురిసే అవకాశం ఉంది. యూరోపియన్ సెంటర్ ఫర్ మీడియం-రేంజ్ వెదర్ ఫోర్‌కాస్ట్స్ (ECMWF) వర్షపాత అంచనాల ప్రకారం.. రాబోయే 15 రోజుల్లో మధ్య, తూర్పు, ఉత్తర భారతదేశంలోని అనేక ప్రాంతాల్లో వర్షాలు కరిసే అవకాశం ఉన్నట్లు తేలింది. దేశంలో రుతుపవనా కాలంలో సుదీర్ఘ దశ ఏర్పడే సూచనలు లేకపోవడం మంచి పరిణామంగా కనిపిస్తోంది. ఈ వాతావరణ అంచనాలు రైతుల్లో ఆనందాన్ని నింపుతున్నాయి.

బంగాళాఖాతంలో వరస అల్పపీడనాలు:

బంగాళాఖాతాన్ని రుతుపవనాలకు ‘‘వర్షాల ఫ్యాక్టరీ’’గా పిలుస్తారు. ప్రస్తుతం ఇది సాధారణం కన్నా మరింత చురుకుగా ఉండే అవకాశం కనిపిస్తోంది. వరసగా ఒకదాని తర్వాత ఒకటి అల్పపీడన వ్యవస్థలు ఏర్పడే అవకాశాలు ఏర్పడుతున్నాయి. వీటి వల్ల భారత ఉపఖండం అంతటా భారీ వర్షాలు పడే అవకాశం ఉంది. తాజా వాతావరణ అంచనాల ప్రకారం, కొత్త అల్పపీడనాలు తక్కువ వ్యవధిలో ఏర్పడి, భూభాగం వైపు కదిలే అవకాశం ఉంది. వీటి ద్వారా ఒడిశా, పశ్చిమ బెంగాల్, జార్ఖండ్, బీహార్, ఛత్తీస్‌గఢ్, మధ్యప్రదేశ్, ఉత్తరప్రదేశ్, ఈశాన్య భారతదేశంలోని కొన్ని ప్రాంతాల్లో వర్షాలు కురస్తాయి.

ఎల్‌నినో పరిస్థితులకు చెక్..

ఈ ఏడాది పసిఫిక్ మహాసముద్రంలో ఎల్‌నినో వాతావరణ పరిస్థితులు ఏర్పడి, భారత్‌లో రుతుపవనాలను దెబ్బతీస్తాయనే ఆందోళన నెలకొంది. అయితే, బంగాళాఖాతంలో అల్పపీడన వ్యవస్థలు ఏర్పడే అవకాశం ఉండటంతో మాన్‌సూన్ సర్క్యులేషన్ చురుకుగా కొనసాగే అవకాశం ఉంది. ఇది ఎల్‌నినో తరహా పరిస్థితుల ప్రతికూల ప్రభావాన్ని కొంతవరకు అడ్డుకట్ట వేయవచ్చని అంచనా. ప్రస్తుతం వాతావరణ నమూనాలు సుదీర్ఘ మాన్‌సూన్ బ్రేక్ ఏర్పడే అవకాశం తక్కువగా ఉన్నట్లు సూచిస్తున్నాయి. ఇదే పరిస్థితి కొనసాగితే సీజన్ మొత్తంలో వర్షపాతం లోటు మరింత పెరగకుండా ఉండే ఛాన్స్ ఉంది.