మొక్కే కదా అని పీకాడు.. ప్రాణాలు కోల్పోయాడు

మెగాస్టార్ చిరంజీవి నటించిన ఇంద్ర సినిమాలో పాపులర్ డైలాగ్ మీకు గుర్తుందా? మొక్కే కదా పీకితే పీకకోస్తా అంటాడు చిరంజీవి. సరిగ్గా ఇలాంటి ఘటనే మధ్యప్రదేశ్‌లో తాజాగా చోటుచేసుకుంది. తన పొలంలోని మొక్కను పీకినందుకు 7 ఏళ్ల బాలుడిని 12 ఏళ్ల బాలుడు చంపేశాడు. ఈ ఘటనతో స్థానికులు ఒక్కసారిగా షాక్ తిన్నారు. వివరాల్లోకి వెళ్తే.. మధ్యప్రదేశ్‌లోని బుర్హాన్‌పూర్ జిల్లా షేక్‌పూర్ గ్రామంలో జనవరి 26న 12 ఏళ్ల బాలుడు తన పొలాన్ని పర్యవేక్షిస్తుండగా అదే గ్రామానికి చెందిన ఏడేళ్ల బాలుడు తన పొలంలో ఓ మొక్క పీకుతూ కనిపించాడు.

Read Also: కరోనా నుంచి కోలుకున్నారా? అయితే మీకు షాకింగ్ న్యూస్

దీంతో 12 ఏళ్ల బాలుడు కోపంతో ఊగిపోయాడు. అక్కడ కనిపించిన ఓ కర్ర తీసుకుని ఏడేళ్ల బాలుడిని స్పృహ తప్పేలా కొట్టాడు. దీంతో ఏడేళ్ల బాలుడి పరిస్థితి విషమంగా మారడంతో స్థానికులు ఆస్పత్రికి తరలించగా.. అక్కడ చికిత్స పొందుతూ మృతి చెందాడు. భయంతో బాలుడి గుండె ఆగిపోవడంతోనే మృతిచెందాడని పోస్టుమార్టంలో వైద్యులు నిర్ధారించారు. కాగా ఈ ఘటనపై పూర్తిస్థాయిలో తాము విచారణ చేపట్టామని పోలీసులు వెల్లడించారు. హత్య చేసిన వ్యక్తి మైనర్ కావడంతో అతడి కేసు నమోదు చేశామని తెలిపారు.