PM Modi: ప్రధాని మోడీకి మెటా క్షమాపణలు.. సాంకేతిక లోపమే కారణమని స్పష్టీకరణ

ప్రధానమంత్రి నరేంద్ర మోడీ అధికారిక ఫేస్‌బుక్ ఖాతాలోని వీడియో తొలగింపుపై సోషల్ మీడియా దిగ్గజం మెటా (Meta) క్షమాపణలు చెప్పింది. సాంకేతిక లోపం కారణంగా వీడియో పొరపాటున తొలగింపు జరిగిందని, అనంతరం దానిని తిరిగి పునరుద్ధరించామని వెల్లడించింది. అంతకుముందు, జూలై 28 తెల్లవారుజామున ఆ వీడియోకు కొంతసేపు ఫేస్‌బుక్‌లో యాక్సెస్ నిలిపివేయబడటంతో ఈ వ్యవహారం చర్చనీయాంశంగా మారింది.

విద్యార్థి నిరసనల నేపథ్యంలో విడుదలైన వీడియో

బొద్దింక జనతా పార్టీ (CJP) నేతృత్వంలో కొనసాగుతున్న 36 రోజుల విద్యార్థి నిరసనల మధ్య, జూలై 23న ప్రధానమంత్రి నరేంద్ర మోడీ విడుదల చేసిన వీడియోకు ప్రాధాన్యం ఏర్పడింది. ఇందులో పేపర్ లీక్ ఘటనలపై స్పందించిన ప్రధాని, తదుపరి కేంద్ర మంత్రివర్గ సమావేశంలో కఠిన చర్యలను ప్రకటిస్తామని హామీ ఇచ్చారు. వీడియో తొలగింపుకు ముందు లక్షలాది మంది వీక్షించినట్లు సమాచారం.

తొలుత చట్టపరమైన అభ్యర్థనగా చూపిన ఫేస్‌బుక్

వీడియో అందుబాటులో లేకపోయిన సమయంలో, చట్టపరమైన అభ్యర్థన కారణంగా వీడియో యాక్సెస్‌ను పరిమితం చేసినట్లు ఫేస్‌బుక్‌లో సందేశం కనిపించింది. అయితే, దీనికి సంబంధించి సంస్థ ఎలాంటి అదనపు వివరాలు వెల్లడించలేదు. ఈ ఘటనపై పలువురు బీజేపీ నాయకులు అభ్యంతరం వ్యక్తం చేస్తూ ఫేస్‌బుక్ చర్యను ప్రశ్నించారు.

అసలు కారణం సాంకేతిక లోపమే

తర్వాత వెలువడిన సమాచారం ప్రకారం, వీడియో తొలగింపునకు ఎలాంటి చట్టపరమైన అభ్యర్థన కారణం కాదని, ప్లాట్‌ఫారమ్‌లో ఏర్పడిన తాత్కాలిక సాంకేతిక లోపం వల్లే వీడియో కొంతసేపు అందుబాటులో లేకుండా పోయిందని తెలిసింది. ఈ సమస్యను గుర్తించిన అనంతరం మెటా వీడియోను తిరిగి పునరుద్ధరించింది.

ఐటీ మంత్రిత్వ శాఖ ముందుకు మెటా అధికారులు

వర్గాల సమాచారం ప్రకారం, ఈ ఘటనపై వివరణ ఇవ్వాలని ఫేస్‌బుక్, ఇన్‌స్టాగ్రామ్ మాతృ సంస్థ మెటా గ్లోబల్ హెడ్ ఆఫ్ పబ్లిక్ పాలసీని కేంద్ర ఎలక్ట్రానిక్స్, ఐటీ మంత్రిత్వ శాఖ సంప్రదించినట్లు తెలుస్తోంది.