Success story: గ్రామీణ నేపథ్యం, IIT చదువు లేదు.. కానీ, రూ. 2.6 కోట్ల ప్యాకేజీ సాధించిన కుర్రాడు..

Success story: ఐఐటీలు, ఎన్ఐటీల్లో చదవితేనే మంచి సాలరీ ప్యాకేజ్ వస్తుందని చాలా మందిలో ఒక భావన ఉంటుంది. కానీ కర్ణాటకకు చెందిన ఓ కుర్రాడు మాత్రం ఈ ఆలోచన చాలా తప్పు అని తేల్చేశాడు. చిన్న గ్రామంలో పుట్టి, స్థానికంగా ఉన్న ఇంజనీరింగ్ కాలేజీలో చదవుకున్న అతను, తన నైపుణ్యాలను నిరంతరం సానపెట్టుకోవడంతో ఎన్విడియా(NVIDIA) లాంటి ప్రసిద్ధి టెక్ దిగ్గజ కంపెనీలో ఉద్యోగం సంపాదించాడు. ఏకంగా ఏడాదికి రూ. 2.6 కోట్ల ప్యాకేజీని అందుకుంటూ చాలా మందికి స్పూర్తిగా నిలుస్తున్నాడు. ప్రస్తుతం ఈ యువకుడి సక్సెస్ స్టోరీ సోషల్ మీడియాలో వైరల్‌గా మారింది.

గ్రామీణ నేపథ్యం నుంచి అమెరికా వరకు: 

కర్ణాటక రాష్ట్రంలోని చిత్రదుర్గం జిల్లాలో ఓ మారుమూల గ్రామానికి చెందిన పృథ్వీరాజ్ బెంగళూర్‌లోని PES యూనివర్సిటీలో ఎలక్ట్రానిక్స్ ఇంజినీరింగ్ పూర్తి చేశాడు. తన గ్రామానికి పెద్దగా టెక్ సౌకర్యాలు లేవు. ఐఐటీలతో పోలిస్తే చాలా తక్కువ స్థాయి కాలేజీ, అయినా కూడా పృథ్వీ కేవలం క్లాసు రూముల్లో పుస్తకాలకే పరిమితం కాకుండా ప్రాజెక్టులు, ఇంటర్న్‌షిప్‌లు, కొత్త టెక్నాలజీపై దృష్టి పెట్టాడు. తనకు క్లాస్ రూముల్లో భోదించని వాటిని కూడా స్వయంగా నేర్చుకుంటూ తన నైపుణ్యాలను పెంచుకున్నాడు.

ఇంజనీరింగ్ తర్వాత తన ఉన్నత విద్య కోసం అమెరికా వెళ్లాడు. ఆర్థిక ఇబ్బందులు, సరైన మార్గనిర్దేశం లేదు. అయినా కూడా ఇవేవీ పృథ్వీ లక్ష్యాలను నీరుగార్చలేదు. టైర్-3 యూనివర్సిటీలో మాస్టర్స్ పూర్తి చేశాడు. ఉద్యోగం కోసం అప్లై చేయడం నుంచి కెరీర్ ప్లానింగ్ వరకు ప్రతీది స్వయంగా నేర్చుకుంటూ ముందుకు సాగాడు. చాలా మందికి ఆర్థిక స్తోమత ఉండీ, గైడెన్స్ ఉండీ కూడా విఫలమవుతున్న ఈ రోజుల్లో పృథ్వీ మాత్రం ఎక్కడా వెనక్కి తగ్గలేదు.

ఎన్విడియాలో జాబ్:

చివరకు అతని కష్టానికి ఫలితం దక్కింది. ఏఐ టెక్నాలజీకి ఆయువుపట్టుగా ఉన్న చిప్ మేకర్ ఎన్విడియా కంపెనీ డీప్ లెర్నింగ్ టీమ్‌లో పృథ్వీకి ఉద్యోగం వచ్చింది. అతనికి ఏడాదికి సుమారు 26 మిలియన్ రూపాయలు (దాదాపు రూ.2.6 కోట్లు) వేతనం లభిస్తున్నట్లు సోషల్ మీడియాలో వైరల్ అవుతున్న పోస్టులో పేర్కొన్నారు.‘‘ఒకప్పుడు సాంకేతికత కూడా సరిగా అందుబాటులో లేని గ్రామం నుంచి వచ్చిన నేను ఈ స్థాయికి చేరుకోవడం అసాధ్యం అనిపించింది. కానీ ప్రతీ కష్టం, ప్రతీ ఎదురుదెబ్బ నన్ను మరింత కఠినంగా మార్చాయి. ఎన్విడియాలో చేరడంతో నా కల నెరవేరింది. ప్రపంచంలోని అత్యుత్తమ ఇంజినీర్లతో కలిసి AI, డీప్ లెర్నింగ్ వంటి అత్యాధునిక టెక్నాలజీలపై పనిచేసే అవకాశం రావడం చాలా ఆనందంగా ఉంది’’ అంటూ తన సక్సెస్ స్టోరీలో పేర్కొన్నారు.