Rs50,000 FD for Third Child: కొత్త పథకం.. మూడో సంతానం పుడితే భారీ ప్రోత్సాహం.. రూ.50 వేల ఫిక్స్‌డ్ డిపాజిట్

Kutch Kadwa Patidar Samaj Announces Third Child Incentive: సాధారణంగా చిన్న కుటుంబం, ఇద్దరు పిల్లల నినాదాలు ఎక్కువగా వినిపిస్తుంటాయి. అయితే గుజరాత్‌లోని ఓ సామాజిక వర్గం మాత్రం తగ్గుతున్న జనాభాను దృష్టిలో పెట్టుకుని భిన్నమైన నిర్ణయం తీసుకుంది. కుటుంబంలో మూడో బిడ్డ పుడితే ఆ శిశువు పేరుతో రూ.50,000 ఫిక్స్‌డ్ డిపాజిట్ (FD) చేయనున్నట్లు కచ్ కడ్వా పటిదార్ సమాజం ప్రకటించింది.

సూరత్‌లోని కడోదరాలో జరిగిన కచ్ కడ్వా పటిదార్ సమాజం దక్షిణ గుజరాత్ జోన్ వార్షిక సమావేశంలో ఈ ‘బాల ప్రోత్సాహన్ యోజన’ను ప్రకటించారు. ఈ పథకం ప్రకారం కుటుంబంలో మూడో బిడ్డ జన్మిస్తే.. ఆ బిడ్డ అబ్బాయి అయినా, అమ్మాయి అయినా అతని లేదా ఆమె పేరుతో రూ.50,000 FD చేయనున్నారు. ఈ ఫిక్స్‌డ్ డిపాజిట్ గరిష్ఠంగా 10 సంవత్సరాల కాలానికి చేయనున్నట్లు నివేదికలు పేర్కొంటున్నాయి.

ఎందుకు ఈ నిర్ణయం?

కచ్ కడ్వా పటిదార్ సమాజంలో జనాభా తగ్గుతున్న నేపథ్యంలో ఈ నిర్ణయం తీసుకున్నట్లు సమాజ ప్రతినిధులు తెలిపారు. యువ దంపతుల్లో కొందరు ఒక్క బిడ్డకే పరిమితం కావడం లేదా పిల్లలు వద్దనే నిర్ణయం తీసుకోవడం వంటి ధోరణిపై సమావేశంలో చర్చ జరిగినట్లు సమాచారం. మూడో బిడ్డను కనడానికి కుటుంబాలను ప్రోత్సహించడం, సమాజంలో జనాభా సమతుల్యతను కొనసాగించడం ఈ పథకం ఉద్దేశంగా సమాజ నాయకులు పేర్కొన్నట్లు వార్తా నివేదికలు తెలిపాయి.

మూడో బిడ్డకు ఆర్థిక ప్రోత్సాహంతో పాటు, ముగ్గురు పిల్లలను కలిగి ఉన్న తల్లిదండ్రులను ప్రజా కార్యక్రమంలో సన్మానించాలనే ప్రతిపాదన కూడా చేసినట్లు సమాచారం. సమాజంలోని యువ దంపతుల్లో పెద్ద కుటుంబాలపై ఆసక్తి పెంచేందుకు ఈ విధమైన ప్రోత్సాహక చర్యలు తీసుకుంటున్నట్లు నిర్వాహకులు తెలిపారు. దక్షిణ గుజరాత్‌లో కచ్ కడ్వా పటిదార్ సమాజానికి సుమారు 17,000 మంది జనాభా ఉన్నట్లు అందిన నివేదికలో పేర్కొన్నారు. జనాభా క్రమంగా తగ్గుతున్న పరిస్థితిని దృష్టిలో పెట్టుకుని ఈ అంశంపై సమాజ నాయకులు ఆందోళన వ్యక్తం చేస్తున్నట్లు సమాచారం. ఇప్పటికే సమాజంలో వివిధ సంక్షేమ కార్యక్రమాలు కొనసాగుతున్నాయని ప్రతినిధులు తెలిపారు.

మూడో బిడ్డ విషయంలో లింగభేదం లేదు

ఈ పథకంలో మరో అంశం ఏమిటంటే.. మూడో సంతానం అబ్బాయి లేదా అమ్మాయి అనే తేడా లేకుండా ప్రయోజనం అందించనున్నారు. అంటే మూడో బిడ్డగా పుట్టే శిశువు పేరుతోనే రూ.50,000 FD చేయనున్నట్లు నివేదికలు పేర్కొన్నాయి. అయితే ఈ పథకం ఒక సామాజిక సంస్థ తీసుకున్న నిర్ణయం మాత్రమేనని, ఇది గుజరాత్ ప్రభుత్వం ప్రకటించిన ప్రభుత్వ పథకం కాదని గమనించాలి.