Essential Commodity Prices: వంటింట్లో మంటలు.. 42 వస్తువుల్లో 41 ధరలు పెరుగుదల..! నిత్యావసరాల తాజా లెక్కలివే

Essential Commodity Prices: “ఏం కొనేటట్టు లేదు.. ఏం తినేటట్టు లేదు”.. అంటూ గతంలో అప్పటి పరిస్థితులపై రచయితలు పాటలు చేశారు.. అయితే, ఇప్పుడు మరోసారి అలాంటి పరిస్థితులు వస్తున్నాయా అంటే.. గత కొంత కాలంగా పెరుగుతున్న ధరలు చూస్తే ధర పుట్టకమానదు.. సామాన్యులపై ధరల భారం మరింత పెరుగుతోంది. నిత్యావసర వస్తువుల ధరలపై ప్రభుత్వ పర్యవేక్షణ గణాంకాల ప్రకారం, గత ఏడాది కాలంలో పోల్చిన 42 వస్తువుల్లో 41 వస్తువుల చిల్లర ధరలు పెరిగాయి. ఒక్క బంగాళాదుంపల ధరలు మాత్రమే తగ్గాయి. ముఖ్యంగా ఉల్లిపాయలు, చక్కెర, వంట నూనెల ధరలు గణనీయంగా పెరగడంతో కుటుంబాల నెలవారీ బడ్జెట్లపై ఒత్తిడి పెరుగుతోంది. మరోవైపు, సెప్టెంబర్‌లో రిటైల్ ద్రవ్యోల్బణం 5.54 శాతానికి, ఆహార ద్రవ్యోల్బణం 7.74 శాతానికి చేరినట్లు నివేదిక పేర్కొంది.

ఉల్లిపాయల ధరల్లో భారీ పెరుగుదల
నిత్యావసర వస్తువుల ధరల పెరుగుదలలో ఉల్లిపాయలు ముందున్నాయి. ప్రభుత్వ ధరల పర్యవేక్షణ డేటా ప్రకారం, ఏడాది కాలంలో ఉల్లిపాయల చిల్లర ధరలు దాదాపు 113 శాతం పెరిగాయి. అక్టోబర్ 12 నాటికి దేశవ్యాప్తంగా ఉల్లిపాయల సగటు చిల్లర ధర కిలోకు రూ.53.37గా నమోదైంది. మహారాష్ట్రలో ఖరీఫ్ ఉల్లి ఉత్పత్తి 5 నుంచి 7 శాతం తగ్గవచ్చని వాణిజ్య వర్గాలు అంచనా వేస్తున్నాయి. అయితే, ప్రధాన ఉల్లి ఉత్పత్తి రాష్ట్రాల్లో కొత్త పంట మార్కెట్లకు చేరడం ప్రారంభమైంది. సరఫరా పెరిగితే ధరలు తగ్గే అవకాశం ఉందని ప్రభుత్వం భావిస్తోంది. రానున్న రోజుల్లో ఉల్లి ధరలు ఎంతవరకు తగ్గుతాయనేది కొత్త పంట రాక, మార్కెట్‌లో సరఫరాపై ఆధారపడి ఉంటుంది.

పప్పుధాన్యాల ధరలూ పైపైకి
కుటుంబాల ఆహార బడ్జెట్‌లో కీలకమైన పప్పుధాన్యాల ధరలు కూడా పెరిగాయి. ఏడాది క్రితం కిలో కందిపప్పు సగటు ధర సుమారు రూ.113 ఉండగా, అక్టోబర్ 12 నాటికి రూ.129కు చేరింది. దేశంలోని నాలుగు ప్రధాన నగరాల్లో కందిపప్పు ధర కిలోకు రూ.140 నుంచి రూ.145 మధ్య నమోదైంది. శనగపప్పు సగటు ధర కూడా సుమారు 6.4 శాతం పెరిగి కిలోకు రూ.85 నుంచి రూ.91కు చేరింది. పప్పుధాన్యాల ధరల పెరుగుదలతో రోజువారీ ఆహార అవసరాల కోసం కుటుంబాలు మరింత ఖర్చు చేయాల్సి వస్తోంది.

వంట నూనెల ధరలు కూడా పెరుగుదల
వంట నూనెల ధరలు పెరగడం గృహ బడ్జెట్లపై మరో భారంగా మారింది. సన్‌ ఫ్లవర్‌ నూనె సగటు చిల్లర ధర లీటరుకు సుమారు రూ.191కు చేరింది. ఇది ఏడాది క్రితంతో పోలిస్తే దాదాపు 18 శాతం అధికం. పామాయిల్ ధరలు 15.2 శాతం, సోయాబీన్ నూనె ధరలు 14.6 శాతం పెరిగాయి. ఆవ నూనె సగటు ధర కూడా లీటరుకు రూ.188 నుంచి రూ.204కు చేరింది. వంట నూనెల ధరల పెరుగుదల నేరుగా కుటుంబాల ఖర్చులపై ప్రభావం చూపడమే కాకుండా, ఆహార ఉత్పత్తుల తయారీ వ్యయాన్ని కూడా పెంచే అవకాశం ఉంది.

బియ్యం, చక్కెర ధరల పెరుగుదల
ప్రజల రోజువారీ ఆహారంలో ప్రధానమైన బియ్యం ధరలు కూడా పెరిగాయి. సాధారణ బియ్యం సగటు చిల్లర ధర ఏడాదిలో సుమారు 12 శాతం పెరిగి కిలోకు రూ.47కు చేరింది. చక్కెర ధర కిలోకు రూ.56 దాటింది. నెల రోజుల క్రితం కిలో చక్కెర ధర సుమారు రూ.59గా ఉండగా, ఇటీవల కొంత తగ్గుదల కనిపించింది. అయినప్పటికీ, ఏడాది క్రితంతో పోలిస్తే చక్కెర ధర దాదాపు 22 శాతం అధికంగానే ఉంది. ఇదే సమయంలో గోధుమలు, గోధుమ పిండి ధరల్లో తక్కువ స్థాయి పెరుగుదల నమోదైంది.

టమాటా ధరలు పెరిగాయి.. బంగాళాదుంపలే చౌక
కూరగాయల ధరల్లోనూ పెరుగుదల కనిపిస్తోంది. అక్టోబర్ 12 నాటి ప్రభుత్వ గణాంకాల ప్రకారం, టమాటా సగటు చిల్లర ధర గత ఏడాది కిలోకు రూ.36 ఉండగా, ప్రస్తుతం రూ.42కు చేరింది. అయితే, బంగాళాదుంపల ధరలు ఏడాది కాలంలో 6 శాతానికి పైగా తగ్గాయి. ధరలను పోల్చిన 42 నిత్యావసర వస్తువుల్లో ఏడాదివారీగా ధర తగ్గిన ఏకైక వస్తువు బంగాళాదుంపలే కావడం గమనార్హం. మరోవైపు.. ఇతర కూరగాయల ధరలు కూడా భారీగా పెరిగాయి..

కుటుంబ బడ్జెట్లపై ద్రవ్యోల్బణం ప్రభావం
సెప్టెంబర్‌లో రిటైల్ ద్రవ్యోల్బణం 5.54 శాతానికి, ఆహార ద్రవ్యోల్బణం 7.74 శాతానికి పెరగడం నిత్యావసర వస్తువుల ధరల ఒత్తిడిని స్పష్టం చేస్తోంది. ఉల్లిపాయలు, పప్పుధాన్యాలు, వంట నూనెలు, బియ్యం వంటి వస్తువుల ధరలు పెరగడంతో నెలవారీ ఖర్చులను నిర్వహించడం కుటుంబాలకు సవాలుగా మారుతోంది. ఉల్లి ధరల్లో ఉపశమనం లభించాలంటే కొత్త పంట మార్కెట్లకు చేరడం, సరఫరా మెరుగుపడటం కీలకం. మొత్తంగా, నిత్యావసర వస్తువుల ధరల కదలికలు సామాన్యుల జీవన వ్యయంపై ప్రభావం చూపుతుండటంతో రానున్న రోజుల్లో మార్కెట్ ధరలపై అందరి దృష్టి నెలకొంది.