Diesel Shortage in chennai city: చెన్నై నగరంలో డిజిల్ కొరత ఏర్పడింది. నిర్వాహక లోపాల కారణంగానే కొరత ఏర్పడినట్లు తెలుస్తోంది. పలు బంకుల వద్ద నో స్టాక్ బోర్డులు దర్శనమిస్తున్నాయి. డిజిల్ నింపుకోవడానికి వచ్చే వాహనాలతో బంకుల ముందు భారీ క్యూ ఏర్పడింది. క్రూడాయిల్ కొరత, పంపిణీ సమస్యల కారణంగా డిజిల్ కొరత ఏర్పడినట్లు తెలుస్తోంది. అయితే ఉన్నట్టుండి డిజిల్ కొరత రావడంతో ప్రజలు ఆందోళనకు గురయ్యారు. ఒక్క చెన్నైలోనే కాకుండా తమిళనాడులోని పలు నగరాల్లో కూడా డిజిల్ కొరత ఏర్పడినట్లు తెలుస్తోంది.
పెట్రోల్, డిజిల్ కొరత కారణంగా ప్రజలు తీవ్ర అవస్థలు పడ్డారు. నేడు కూడా కొన్ని బంకుల్లో నో స్టాక్ బోర్డులే దర్శనమిస్తున్నాయి. నగరంలో 90 శాతం బంకుల్లో నో స్టాక్ బోర్డులే ఉన్నాయి. డిజిల్ దొరక్కపోవడంతో ట్రక్కులు, బస్సులు, వ్యాన్లు, జీపులు, కార్ల యజమానులు తీవ్ర ఇబ్బందులు ఎదుర్కొన్నారు. గత కొద్ది రోజులుగా చమురు సంస్థలు డీలర్లు నిర్వహించే పెట్రోల్ బంకులకు తక్కువ పరిమాణంలో డిజిల్ సరఫరా చేయడంతోనే ఈ కొరత వచ్చినట్లు తెలుస్తోంది. అంతర్జాతీయ మార్కెట్ లో ముడి చమురు ధర పెరుగుతుండటంతో పాత ధరకే డిజిల్ సరఫరా చేస్తే తమకు నష్టాలు వస్తాయని భావించే హిందూస్థాన్‌ పెట్రోలియం నగరానికి తక్కువగా డీజిల్‌ను సరఫరా చేస్తున్నట్లు ఆరోపణలు వస్తున్నాయి.
Read Also: Praveen Nettaru Case: ప్రవీణ్ నెట్టారు మర్డర్ కేసు.. 33 చోట్ల ఎన్ఐఏ సోదాలు
భారత్ పెట్రోలియం కార్పొరేషన్ లిమిటెడ్‌కు చెందిన కొన్ని రిటైల్ ఇంధన అవుట్ లెట్ నిర్వహణ సమస్యల కారణంగా చెన్నైలో తాత్కాలిక సరఫరా కొరత ఏర్పడిందని.. వాటిని పునరుద్ధరించినట్లు అధికారులు మంగళవారం తెలిపారు. అయితే ఇండియన్ ఆయిల్ ఎలాంటి సమస్య ఎదురుకాలేదని చెప్పింది. కొన్ని నిర్వహణ సమస్యల కారణంగా, చెన్నైలో డిజిల్, పెట్రోల్ సరఫరాకు అంతరాయం ఏర్పడిందని.. ఇప్పుడు నిరంతరంగా సరఫరాకు హామీ ఇస్తున్నట్లు భారత్ పెట్రోలియం కార్పోరేషన్ లిమిటెడ్ తెలిపింది.
