దేశ రాజధానిలో నిరసనలు, ధర్నాలు నిర్వహించే విషయంలో ఢిల్లీ పోలీసులు సంచలన నిర్ణయం తీసుకున్నారు. ఇప్పటివరకు నిరసనలకు అనుమతించిన ప్రదేశాల్లో ఒకటైన జంతర్ మంతర్‌ను ఆ జాబితా నుంచి తొలగించారు. ఇకపై అక్కడ నిరసనలు, ఆందోళనలు నిర్వహించేందుకు అనుమతి ఉండదని అధికారిక నోటీసులో పేర్కొన్నారు. ఢిల్లీలో నిరసనలు నిర్వహించేందుకు ప్రత్యామ్నాయంగా మూడు ప్రాంతాలను పోలీసులు సూచించారు. సీఈసీ జ్ఞానేశ్‌ కుమార్‌ రాజీనామాను డిమాండ్‌ చేస్తూ ఆందోళనలు కొనసాగుతోన్న వేళ ఈ కీలక పరిణామం చోటుచేసుకుంది.
రామ్‌లీలా మైదాన్, బురారీ మైదాన్, తూర్పు ఢిల్లీలోని సీబీడీ గ్రౌండ్‌లను నిరసనలకు వేదికలుగా వినియోగించుకోవచ్చని ఢిల్లీ పోలీసులు వెల్లడించారు. పౌరులు తమ నిరసన తెలిపే హక్కును వినియోగించుకునేందుకు ప్రత్యామ్నాయ ప్రాంతాలను పరిశీలించాలని కేంద్ర హోం వ్యవహారాల మంత్రిత్వ శాఖ గతంలో ఓ కమిటీని ఏర్పాటు చేసింది. ఆ కమిటీ సిఫారసుల ఆధారంగా జంతర్ మంతర్‌ను నిరసన వేదికల జాబితా నుంచి తొలగించినట్లు ఢిల్లీ పోలీసుల నోటీసుల్లో పేర్కొన్నారు. కమిటీ సిఫార్సుల మేరకు జంతర్ మంతర్‌ను నిరసనల వేదికగా డీనోటిఫై చేస్తున్నాం అని ఢిల్లీ పోలీసు కమిషనర్‌ అనురాగ్‌ కుమార్‌ వెల్లడించారు. నిరసనలు, ఆందోళనల నిర్వహణకు సంబంధించి ఈ మూడు ప్రాంతాల్లో అనుసరించాల్సిన విధివిధానాలపై ప్రత్యేకంగా సవరించిన స్టాండర్డ్ ఆపరేటింగ్ ప్రొసీజర్‌ (SOP)ను త్వరలో విడుదల చేయనున్నట్లు తెలిపారు. 2022 ఏప్రిల్ 28న జారీ చేసిన పాత ఆదేశాల్లో పాక్షిక మార్పులు చేస్తూ తాజా నోటీసు ఇచ్చినట్లు అధికారులు పేర్కొన్నారు.
ఎన్నికల సంఘంపై ఆరోపణలు చేస్తూ ప్రతిపక్ష ఇండియా కూటమి నేతలు, ఎంపీలు ఢిల్లీలో నిరసన ర్యాలీ చేపట్టారు. ఎన్నికల ప్రక్రియలో అవకతవకలు జరుగుతున్నాయని, ప్రజాస్వామ్య సంస్థల పనితీరుపై ఆందోళనలు ఉన్నాయని పేర్కొంటూ వారు తమ నిరసనను తీవ్రతరం చేశారు. ఈ నేపథ్యంలో కేంద్ర ఢిల్లీలో భద్రతను కట్టుదిట్టం చేశారు. పలు ప్రాంతాల్లో బారికేడ్లు ఏర్పాటు చేశారు. కాంగ్రెస్ ప్రధాన కార్యదర్శి కేసీ వేణుగోపాల్ మాట్లాడుతూ ఎన్నికల సంఘానికి వ్యతిరేకంగా జరుగుతున్న ఆందోళనను పెద్ద ఉద్యమంగా అభివర్ణించారు. రాజకీయంగా పోరాటం కొనసాగించడంతో పాటు సుప్రీంకోర్టును కూడా ఆశ్రయిస్తామని తెలిపారు. ఎన్నికల వ్యవస్థను దెబ్బతీసేందుకు కేంద్ర ప్రభుత్వం ప్రయత్నిస్తోందని ఆయన ఆరోపించారు.