CJP Deepfake Case: PM మోదీతో మహిళ మార్ఫ్‌డ్ ఫొటోలు.. CJP నేతలకు హైకోర్టు నోటీసులు

CJP Deepfake Case: మహిళ ఫోటోను ఏఐ ఉపయోగించి, ఫేస్ స్వాపింగ్ టెక్నాలజీ సాయంతో మార్ఫ్ చేసి, సోషల్ మీడియా ఫ్లాట్‌ఫారమ్‌లలో ప్రచారం చేశారనే ఆరోపణలపై ఢిల్లీ హైకోర్టు కీలక ఆదేశాలు జారీ చేసింది. ఆ మహిళ అభ్యంతర చిత్రాలను, లింకులను 24 గంటల్లో తొలగించాలని మెటాను ఆదేశించింది. ఇదే కాకుండా మహిళకు పోలీస్ రక్షణ ఇవ్వాలని సూచించింది.

ఈ కేసులో కాక్రోచ్ జనతా పార్టీ (CJP) ప్రధాన నాయకులు సౌరవ్ దాస్, అభిజిత్ దీప్కే, అశుతోష్ రాంకా, రత్న సింగ్‌లకు హైకోర్టు నోటీసులు జారీ చేసింది. ఈ కేసులో ఢిల్లీ పోలీసులు సీజేపీ నేతల ప్రమేయం ఉందని అనుమానిస్తున్నారు. కోర్టు తన నోటీసుల్లో వారిపై వస్తున్న ఆరోపణలపై స్పందించాలని కోరింది. ఈ కేసుపై ఢిల్లీ పోలీసులు ఇప్పటికే ‘గుర్తుతెలియని వ్యక్తుల’పై ఎఫ్ఐఆర్ నమోదు చేశారు. అయితే, ఈ కేసులో సీజేపీ నేతలపై ఎఫ్ఐఆర్ నమోదు కాలేదు.

ఢిల్లీలోని జంతర్ మంతర్ వద్ద జరిగిన సీజేపీ నిరసనల సమయంలో ఒక మహిళ వ్యక్తిగత ఫోటోను అనుమతి లేకుండా ఏఐ ఉపయోగించి, ప్రధాని నరేంద్రమోడీతో కలిసి ఉన్నట్లుగా అభ్యంతరకర చిత్రాన్ని ప్రచారం చేశారు. దీనిపై సదరు మహిళ కోర్టును ఆశ్రయించారు. ఈ చిత్రాలను సోషల్ మీడియా, ముఖ్యంగా ఇన్‌స్టాగ్రామ్‌లో ప్రచారం చేయడంతో పాటు, నిరసనల స్థలంలో బ్యానర్లు, పోస్టర్లపై కూడా ప్రదర్శించారని ఆమె తన పిటిషన్‌లో పేర్కొన్నారు. దీని తర్వాత తనకు బెదిరింపులు వచ్చాయని, తనకు రక్షణ కల్పించాలని కోర్టును కోరింది. ఈ నేపథ్యంలో మహిళకు రక్షణ ఇవ్వడంతో పాటు, చిత్రాలను 24 గంటల్లో తొలగించాలని మెటాను కోర్టు ఆదేశించింది. ఢిల్లీ పోలీసులకు నోటీసులు ఇచ్చి రెండు వారాల్లో స్టేటస్ రిపోర్టు ఇవ్వాలని కోర్టు కోరింది.